Book: I Too Had a Love Story

પુસ્તકનું નામ: આઇ ટુ હેડ અ લવ સ્ટોરી
લેખક: રવિન્દર સિંઘ

– ઘણાં દિવસ પછી આજે કોઇ પુસ્તક વિશે લખવાનું મન થયું છે. આપણે ત્યાં વાર્તા-નવલકથા-ફિલ્મમાં સામાન્ય રીતે ‘હેપ્પી એન્ડીંગ’ની બોલબાલા છે અને એટલે જ મુંબઇવાળા પેલા શાહરુખભાઇને પણ કહેવું પડયું છે કે, “અગર અંત મે સબકુછ ઠીક નહી હો જાતા તો સમજો, પિક્ચર અભી બાકી હૈ મેરે દોસ્ત….”

– આપણને (એટલે કે ભારતીય દર્શકો-વાચકોને) દુઃખી અંત માફક નથી આવતો. પરંતુ આજે વાત કરવી છે એક એવા પુસ્તકની કે જેમાં ‘હેપ્પી એન્ડીંગ’ ના બદલે કરુણ અંત છે.

– Play Books store માં એમ જ ખાંખા-ખોળા કરતા આ પુસ્તક ધ્યાનમાં આવ્યું અને માત્ર વાચકોના રિવ્યુ-રેટીંગ (અને ડિસ્કાઉન્ટ!) જોઇને ખરીદવાનો વિચાર બનાવ્યો. આમ પણ આપણને લવ સ્ટોરીમાં રસ ખરો. લેખકનું નામ થોડુંક જાણીતું લાગ્યું પણ આજસુધી તેમના કોઇ પુસ્તકનો અનુભવ ન હોવાથી થયું કે એમને વાંચવાનો અખતરો પણ કરી જોઇએ. (અખતરા કરવા એ તો મારો જુનો શોખ છે.) આમ, કોઇ જ પુર્વધારણા કે પુસ્તકના વિવરણ વગર પુસ્તકને ખરીદીને વાંચવાની શરૂઆત કરી.

– લાંબા સમય બાદ ચાર મિત્રો વચ્ચે મુલાકાતની સામાન્ય ઘટનાથી સોફ્ટવેર એન્જીનીયર રવિન પોતે આ પુસ્તકની શરૂઆત કરે છે. આ મુલાકાત રવિનને પોતાની માટે કોઇ જીવનસાથી શોધવાની પ્રેરણા આપે છે અને પોતાની પસંદના હમસફર શોધવાની વાત ઓનલાઇન મેટ્રીમોનીયલ સાઇટમાં રજીસ્ટ્રેશન સુધી પહોંચે છે. શરૂઆત ધીમી પણ સરસ રીતે થાય છે જેમાં વેબસાઇટ દ્વારા ખુશી નામની છોકરી તેના સંપર્કમાં આવે છે. (જે રવિનના બાયોડેટા દ્વારા તેનો સંપર્ક કરે છે અને ઘણી સરળતાથી શરૂઆત થાય છે એક લવ સ્ટોરીની…)

– આજના ફાસ્ટ જમાનામાં પણ એકબીજાને પ્રત્યક્ષ મળ્યા કે જાણ્યા વગર, માત્ર બાયોડેટા અને ફોટો જોઇને, અને મોબાઇલથી વાતો કરીને પ્રેમમાં પડવાની વાત સુધી પહોંચતું આ પુસ્તક મને વધુ ગમવાનું કારણ પણ એવું જ છે. (હવે તમને થશે કે હું તે કારણ અહી જાહેરમાં જણાવીશ… ના બાબા ના, કંઇક તો અંગત જેવું રહેવા દઉ જીવનમાં.) અતિશ્યોક્તિ વગરના શુધ્ધ, નિખાલસ અને સરળ પ્રેમનું સુંદર આલેખન જોવું હોય તો આ બુક એકવાર વાંચવી જ પડે!

– વાંચતી વખતે મારા મનમાં એ ખ્યાલ હતો કે આખરે બધું ઠીક થઇ જ જશે અને આનંદ-ઉત્સવની વાત સાથે આ પુસ્તકનો અંત આવશે. પરંતુ અંત આવો હોઇ શકે તેની મેં જરાયે કલ્પના કરી નહોતી. (રેટીંગ પર વધારે ધ્યાન હતું એટલે ઉડતી નજરે રીવ્યુ દેખ્યા હતા.)

– બે દિવસમાં તો લગભગ ૭૦% પુસ્તક વંચાઇ ગયું હતું. ત્રીજા દિવસે સવારે ઉંઘ વહેલી ઉડી જતા સવારના સમયને પસાર કરવામાં આખું પુસ્તક પુરું કરવામાં આવ્યું. પહેલીવાર કોઇ બુક પુરી થઇ જવાનું દુઃખ થયું. કેમ કે તેનો અંત સામાન્ય ધારણા અને માનસિકતાથી વિરુધ્ધ હતો જેને મન તરત સ્વીકારવા માટે તૈયાર ન’તું.

– અંતે એક વાત અહી કહીશ કે, જો આ પુસ્તકના અંતમાં તમારી આંખોમાં આંસુ આવી જાય તો સમજી લેવું કે તમારી અંદર એક સંવેદનશીલ વ્યક્તિ હજુ પણ જીવે છે!

i too had a love story book review in gujarati
I Too Had a Love Story by Ravinder Singh

આ પુસ્તકને બગીચાનંદ તરફથી..

flower rating system by marobagicho.com :) its 4.5/5 star!

5 માંથી 4.5 ફુલડાં!

લેખકના જીવનમાં બનેલી સત્ય-ઘટનાની યાદમાં અંગ્રેજી ભાષામાં લખાયેલ આ પુસ્તકની શૈલી સંપુર્ણ ભારતીય છે. જો કે આ પુસ્તકનો ગુજરાતી અનુવાદ થયો હોય એવી માહિતી મળતી નથી. લેખક દ્વારા આ પુસ્તકના બીજા ભાગરૂપે લખાયેલ પુસ્તક ‘Can Love Happen Twice?’ પણ વંચાઇ ગયું છે પણ તેની વાત ફરી કયારેક કરીશું.


Update: આ પુસ્તકના ગુજરાતી અનુવાદ માટે જુઓ: અહીં (શ્રી નિરવભાઇએ પ્રતિભાવમાં આપેલ જાણકારી મુજબ.)

3 thoughts on “Book: I Too Had a Love Story

બોલો, શું કહેવું છે તમારે...