અપડેટ્સ – 180805

. . .

~ હા ખરેખર બહુજ સમય કહેવાય છેલ્લી અપડેટ્સની નોંધ કરી હતી તેને. સમય આગળ વધતો જાય છે અને હું વિચારતો રહી જઉ છું કે ક્યારેક કંઇક લખીશ. (વિચાર વાંચી શકે એવું મશીન જલ્દી વસાવવું પડશે.)

~ શોર્ટ લાઇફમાં એટલું બધું બન્યું છે કે જો મારી ઉપર રિસર્ચ કરવા બેસે તો એકાદ ફિલ્મ બનાવી શકાય એટલો મસાલો મળી શકે એમ છે. (ના ભ’ઇ ના, સંજુબાબા જેવા કારસ્તાન પણ નથી હોં કે..)

~ બિઝનેસ અને ફેમીલી વચ્ચે સંતુલન મુશ્કેલ બનતું જાય છે અને હું બન્ને વચ્ચે ઝુલતો રહું છું આજકાલ. એમ તો આ સ્થિતિની કલ્પના અગાઉથી કરેલી હતી. (જોયું! હું કેટલું સચોટ ભવિષ્ય જોઇ શકું છું!! બેટે, એવે હી હમ બાબા બગીચાનંદ નહી કેહલાતે..)

~ એક તો વરસાદ પણ જામતો નથી.. વરસાદ જામે તો તેના બહાને થોડું રિલેક્સ થવાનો મોકો મળે એમ છે. (આ વખતે અમદાવાદ લગભગ કોરું રહ્યું છે.)

~ નાયરાને ચાલતા આવડી ગયું છે પણ બોલવામાં હજુ શબ્દો સાથ નથી આપતા. (એમ તો મને કોઇ ઉતાવળ પણ નથી.)

~ અમને એમ હતું કે વ્રજ કરતા શાંત હશે પણ બગ્ગુએ સાબિત કરી આપ્યું કે લડકીયાં ભી કીસી સે કમ નહી હોતી હૈ! સખત ધમાલ કરે છે અને જીદ્દી પણ એટલી જ છે. (હવે એમ લાગે છે કે અમારો ટીનટીન ઘણો સીધો હતો.)

~ આજે દોસ્તોને યાદ કરવાનો દિવસ છે અને મારા દોસ્તો સાથેના સંબંધનો સરવાળો કરું તો લગભગ દરેક દોસ્તોથી કપાઇ રહ્યો હોઉ એવી સ્થિતિ બની શકે છે. (જોકે આમા મારી ખોટી આદત અને કોઇ-કોઇ અંગત કારણો પણ જવાબદાર છે.)

~ ઓકે. આજે આટલું જ.

~ અને હા, I miss Jalebi…

હેડર ચિત્રઃ ઇંદીરા બ્રીજ, અમદાવાદ-ગાંધીનગર હાઇ-વે.
ક્લિક કરનારઃ અમે પોતે!

જીવન-આજકાલ

. . .

– મારી અંદર અને બાહ્ય વિચારોનો ઘણાં બદલાવમાંથી પસાર થતો એક ઉત્તેજક સમયગાળો ચાલી રહ્યો છે. (એમાં પણ હું મારા વિચારોની નોંધ કરી રહ્યો છું ત્યારથી આ બદલાવ ચોખ્ખા જણાઇ રહ્યા છે.)

– ન કરવાનું ઘણું કરી રહ્યો છું કોણ જાણે હું શું ગડબડ કરી રહ્યો છું…. (અગડમ-બગડમ લાગે છે ને… મને પણ લાગે છે, પણ એ જ હકિકત છે !!) જે હોય તે.. પણ, જીવન જીવવાના એક ઉત્તમ સમયગાળામાંથી હું પસાર થઇ રહ્યો છું એવું લાગે છે. (મને આજકાલ દરેક વસ્તુમાં મજા બહુ આવે છે, બોલો… 😀 )

– આ સમય મને મારી કૉલેજકાળની શરૂઆતની યાદ અપાવી રહ્યો છે.. હા, એ સમય.. જયારે હું કોઇપણ ટેન્શન વગર મને અને મારી આસપાસની વસ્તુ-વ્યક્તિને મનભરીને નીરખતો, જાણતો અને માણી શકતો. (આજકાલ એવી જ મજા આવી રહી છે અને કોઇ પરેશાની મોટી લાગતી નથી.)

– બિઝનેસમાં નજીકના સમયમાં જ એક મોટો પડકાર મારી સામે આવવાનો છે પણ કોણ જાણે હું એકદમ બેફિકર છું. (જયારે મારી સાથેના લોકો એ તે અંગે અને ખાસ તો મને બેફિકર જોઇને વધુ ચિંતિત હોય એવું લાગે છે.)

– ભવિષ્ય અંગે વિચારવું અને ભવિષ્યને પારખવું એ દરેક બિઝનેસમાં સૌથી મહત્વનું હોય છે અને જયારે મુખ્ય નીતિમાં ફરક કરી રહ્યા હોવ ત્યારે કેટલાક પડકારો સહન કરવા માનસિક તૈયારી રાખવી જ પડે છે. (અને અત્યારે માનસિક રીતે હું ઘણો મજબુત છું.)

– જે આવવાનું જ છે કે જે થવાનું નક્કી છે તે અંગે અત્યારે ચિંતા કરવાનો મને કોઇ હેતુ નથી જણાતો. (હા, તેને ટાળવાના યોગ્ય વિકલ્પની શોધ ચાલું છે… પણ જો તે નહી મળે તે ‘પડશે એવા દેવાશે’ એવું તો નક્કી જ છે.)

– કમિટમેન્ટ અને નિખાલસતા જાળવવાના પ્રયત્ન ઉચ્ચ કક્ષાએ છે. (નિખાલસતા ફાવી ગઇ છે પણ દરેક કમિટમેન્ટ જાળવવા ઘણાં અઘરા પણ પડી રહ્યા છે.)

– બિઝનેસમાં એક નવું અને મારી કેપેસીટીથી થોડું વધારે રિસ્ક લેવા જઇ રહ્યો છું, જેનો ફાયદો અત્યારે કેટલો થશે એ તો ભગવાન જાણે પણ ભવિષ્યમાં ચોક્કસ ફાયદાકારક રહેશે તેવું જણાય છે. (“રિસ્ક તો સ્પાઇડર-મેન કો ભી લેના પડતા હૈ…”- રણવીર કપુર, ફિલ્મઃરોકેટસિંઘ)

– બિઝનેસની વધારે વ્યસ્તતાનું સૌથી મોટું નુકશાન હું કૌટુંબિક રીતે ભોગવીશ પણ અત્યારે મારી પાસે જે કંઇ ઇચ્છા-શક્તિ છે તેને અનુરૂપ કામ કરવું વધુ જરૂરી લાગે છે. (એક-બે લગ્નમાં નહી જઇ શકાય અને સાસુ-સાળીની બર્થ-ડે જેવા પ્રસંગને જતા કરવા પડશે તેનો કોઇ ગમ પણ નથી…. ;))

– મારા પરિવારને મારા સમયની ખરેખર જરૂર હોવા છતાં આ વ્યસ્તતાના સમયમાં મને સહાયતારૂપ અને હિંમત આપનારો બની રહ્યો છે. (કોઇના સાથની જરાય આશા નથી છતાં પણ આપણી નજીકના લોકો સાથે હોય ત્યારે હિંમત અનેકઘણી વધી જતી હોય છે.)

– બસ, જેમ હું ખુશ રહું છું તેમ મારી આસપાસ પણ હંમેશા ખુશી ફેલાયેલી રહે એવી નાનકડી આશા છે. (કોઇને કોઇ સળી તો કરતા રહેવાના, પણ તેમની તરફ ધ્યાન આપ્યા વગર પોતાની મસ્તીમાં મસ્ત રહેવાનું હવે ફાવવા લાગ્યું છે.)

. . .

કઠોર નિર્ણય

. . .

– આજથી ઓફિસિયલી બિઝનેસની સેકન્ડ બ્રાન્ચનો પુરેપુરો હવાલો સંભાળ્યો.

– આમ તો તે બ્રાન્ચ છેલ્લા ૬ વર્ષથી કાર્યરત છે પણ અત્યાર સુધી તેની સંપુર્ણ જવાબદારી મારા પાર્ટનરને સોંપાયેલી હતી.

– ઘણાં સમયથી તે બ્રાન્ચના એકાઉન્ટ અને કસ્ટમર સાથેના વ્યવહારોના રીપોર્ટ જોઇને હું ચિંતિત હતો. એમાંયે છેલ્લા ત્રણ મહિનાથી ચલાવેલા એકાઉન્ટ સુધારો અભિયાન અને વ્યવહાર બદલો કેમ્પેઇનમાં ધારો તેવો સહયોગ ન મળતા અને મુળ સ્થિતિમાં કોઇ ખાસ સુધારો ન જણાતા આજે છેલ્લા પગલા રૂપે ઉપરનુ કદમ ઉઠાવવામાં આવ્યું છે.

– પાર્ટનરથી લઇ ને પટાવાળા સુધી દરેકની સત્તામાં મહત્તમ કાપ મુકવામાં આવ્યો છે કેમ કે હવે હું કોઇનું કંઇ ચલાવી લેવાના મુડમાં નથી.

– હવેથી વ્યસ્તતા અને જવાબદારીમાં સીધો બે થી ત્રણ ઘણો વધારો થશે.

– જીવનમાં પ્રથમવાર મારા દ્વારા અપનાવવામાં આવેલી કઠોરતા અને કોઇની સાડાબારી રાખ્યા વિના લીધેલો સૌથી કડક નિર્ણય.

– અને છેલ્લે…. “બૉસ ઇઝ ઓલ્વેઝ રાઇટ” – આ કહેવત બધાને સાફ શબ્દોમાં અનુસરવાની સુચના આપવામાં આવી છે.

. . .