અપડેટ્સ – 181021

~ જે કંઇ કર્યું પાછળના એક વર્ષમાં લગભગ અર્થહીન બની ગયું છે. મહેનત અને આવડતનો પુરો ઉપયોગ હતો છતાંયે હું આજે ફરી સમયના એ જ કાળચક્રમાં આવી ગયો છું જ્યાં ક્યારેક હતો. (આમ તો જીવનનો આ એક તબક્કો કહેવાય જેમાં કાર્યના પ્રમાણમાં વળતર મળતું ન હોય.)

~ ગુમાવ્યું તો છે જ અને મસ્ત અનુભવ પણ મેળવ્યો છે. હવે ફરી આગળ જવાનું છે. કોઇ માટે ફરિયાદ નથી. કોઇ પર આક્ષેપ થાય એમ નથી. જે કર્યું એ જાતે કર્યું છે. હા, મનમાં દુઃખ જરુર છે છતાંયે ચહેરા પર હસી આજે પણ એ જ કાયમ છે. (બની શકે કે દુઃખ કરતાં મારી ખુશી તેમાં વધારે હોય.)~ એક વસ્તુ ખાસ શીખવા મળી કે મારી પાસે હિંમત છે સહન કરવાની અને નિર્ણય લેવાની. હારીને તુટી જાય એ વ્યક્તિ હું નથી. હું અઘરા નિર્ણય પણ ઝડપથી લઇ શકુ છું. (મન ઘણું મજબુત છે એ પણ પારખી લીધું.)

~ ઓકે. મારા વિશે મોટી મોટી વાતો ઘણી થઇ ગઇ છે તો હવે બીજા અપડેટ્સની નોંધ લઇએ. બગ્ગુ અને વ્રજની જોડી આજકાલ ઘરમાં ધમાલ મચાવે છે. ઢબુડી મારી બધી જગ્યાએ વ્રજથી વધે એમ છે. (મ્યુઝિક સાથે તો એવું કનેક્શન છે કે ક્યાંય પણ વાગે એટલે નાયરાનો ડાન્સ શરુ થઇ જાય!)~ ઓગષ્ટમાં માઉન્ટ આબુની 12મી ટ્રીપ કરી. થોડા સમય પહેલાંજ આબુ જઇ આવ્યા હોવા છતાં દોસ્તની ઇચ્છાને કારણે અને વળી આબુને નજીકના દેવ ગણીને અમે તેને વધારે પુજી લઇએ એવું છે. વ્રજ માટે પહેલો અનુભવ હતો એટલે તેને ઘણી મજા આવી. (માઉન્ટ આબુની દરેક ગલીઓ વિશે મને કોઇ પુછે તો હું અમદાવાદમાં બેઠા-બેઠા બધું જણાવી શકું છુ.

# એક્સ્ટ્રા ટીપઃ
સિઝનમાં જો આ સ્થળની મજા લેવી હોય શનિવાર-રવિવારની રજા સિવાય જવું.
અને જો પબ્લીકની મજા જોઇતી હોય તો શનિવાર-રવિવાર સિવાય ન જવું.

~ નવરાત્રી તો વ્યસ્તતામાં પુરી થઇ ગઇ પણ દિવાળીમાં પરિવાર અને તહેવારને સમય આપવાનો પુરો પ્લાન છે. (જોઇએ કે પ્લાન કેટલા સફળ થાય છે!)~ આ દિવાળી વેકેશનમાં ટ્રેકિંગ કેમ્પમાં જવાનો વિચાર પણ છે. ઘણાં વર્ષોથી અધુરી આ ઇચ્છા આ વર્ષે દિવાળીમાં પુરી કરવાની ઇચ્છા છે. (ટ્રેકિંગ માટે હિમાલય સૌથી જાણીતી અને સરળ ચોઇસ છે પણ સારા ઓપ્શન હશે તો અન્ય નવા સ્થળને પણ સ્વીકારવામાં આવશે.)

~ હવે બીજા અપડેટ્સ ટુંક સમયમાં જ નોંધવામાં આવશે. ખાસ તો માઉન્ટ આબુના ફોટો માટે એક અલગ પોસ્ટ અહીયાં આવી જાય તો ઠીક રહેશે…



હેડર ચિત્રઃ માઉન્ટ આબુ, રાજસ્થાન.
ક્લિક કરનારઃ સ્વયં હું!

અપડેટ્સ-44 [Oct’14]

– વચ્ચે બે-ત્રણ પોસ્ટ એવી આવી ગઇ એટલે અપડેટ્સ ઉમેરવાનો કાર્યક્રમ લંબાઇ ગયો. હવે આજે છેક નવા મહિનામાં તેનો સમય આવ્યો છે. (જોયું! આ વખતે નવું બહાનું છે!)

– શું ઉમેરવું આજે અને કયાંથી શરૂઆત કરવી એ સમજાતું નથી છતાંયે જેમ-જેમ યાદ આવશે તેમ-તેમ લખતા જવું એવું એમ નક્કી કરું છું. (જો કે હું ગમે તેમ લખું તોયે કોઇને કંઇ ફેર પડવાનો નથી.)

– પાછળના દિવસોમાં સૌથી વધુ યાદ આવે એવી ઘટના છોટુના જન્મદિવસની ઉજવણીની હતી તો તે વિશે થોડું વિસ્તારથી લખવાનો વિચાર કર્યો હતો પણ તેમાં તોફાન-મસ્તી-નાચ-કુદ સિવાય બીજું લખવા જેવું ન લાગ્યું અને જે બે-ચાર ફોટો હતા તેને આગળની પોસ્ટમાં જ ચોંટાડી દેવામાં આવ્યા છે એટલે થોડા-માં-ઘણું સમજીને આગળ વધીએ તો ઠીક રહેશે.

– એક રાષ્ટ્રીય સામાજીક સંગઠનમાં સમાજસેવાની નવી જવાબદારી લેવામાં આવી છે. વ્યસ્તતામાં વધારો થશે એ પણ નક્કી છે અને તે માટે હવે દેશભરમાં નિયમિત પ્રવાસ કરવા પડે એવી શક્યતાઓ પણ છે. (ચલો, એ બહાને દેશના વિવિધ ભાગ વિશે વિસ્તારથી જાણવા મળશે.) કદાચ હવે અહી અનિયમિત બની શકાય એવુંયે બને. (એમ તો હું નિયમિત પણ કયાં છું જ!)

– સંસ્થાના અને મારી જવાબદારીમાં આવતા ઘણાં કાર્યો એવા છે કે જેની અહી જાહેર નોંધ પણ લઇ શકાય. પરંતુ અગાઉ બનાવેલા ઓળખ-ગોપનીયતાના કેટલાક નિયમોના બંધન નડી રહ્યા છે, જેમાં હવે ઘણાં સુધારા-વધારા કરવાની આવશ્યક્તા પણ જણાય છે. મુખ્ય સમસ્યા અંગત ઓળખને જાહેર પ્રસિધ્ધિથી દુર રાખવાની છે. (આમ તો આ કોઇ સમસ્યા નથી પણ હું અહી મારા મનની વાત સીધી જ નોંધતો હોવાથી કોઇ વ્યક્તિ કે વિષય-વસ્તુ પ્રત્યેના દંભથી દુર રહેવા ઇચ્છુ છું.)

– કેટલાક સંબંધો મારી નિખાલસતા માટે હંમેશા નુકસાનકારક રહ્યા છે. સંદર્ભ, પુસ્તક, જ્ઞાની-સાધુ-સંત કે મહાત્માઓ ભલે ગમે તે કહીને ચાલ્યા ગયા હોય પણ મારું સ્પષ્ટ માનવું છે કે સંપુર્ણ નિખાલસ બનીને દરેક સંબંધ જાળવી શકાતા નથી. સંપુર્ણ સત્ય કે નિખાલસતા કયારેક સંબંધોમાં તિરાડ પણ ઉભી કરી શકે છે. (આ ‘સત્ય’ની વાત ઉપરથી યાદ આવ્યું કે મારે મારું સત્ય લખવાનું હજુ બાકી છે.)

– ઓકે. ફરી મુળવાત ઉપર આવીએ. નવી જવાબદારી વિશેની એક ખાસ મિટીંગ માટે બે-ત્રણ દિવસ પુ. શ્રી શ્રી (શ્રી શ્રી શ્રી શ્રી શ્રી શ્રી 😉 ) રવિશંકરભાઇના આર્ટ-ઑફ-લીવીંગના ગુજરાત આશ્રમ વેદ-વિજ્ઞાન મહા-વિદ્યાપીઠમાં વિતાવ્યા. આ સ્થળ ગામ-શહેર (અને મોબાઇલ નેટવર્ક)થી દુર અને વળી નદી કિનારાની ફળદ્રુપ જગ્યાએ હોવાના કારણે હરિયાળી અને કુદરતી વાતાવરણથી ભરપુર છે, તેથી અહી નિરાંત અને શાંતિની અનુભૂતિ થવી સ્વાભાવિક છે. આશ્રમના ફોટો માટે ક્લિક કરો; અહી. (જો તમે આ શાંતિની અનુભૂતિને આ.ઑ.લિ. કે પુ.શ્રી.શ્રી.રવિશંકરની દિવ્યતા સાથે જોડીને જોઇ રહ્યા છો તો મારે સાફ શબ્દોમાં કહેવું જોઇએ કે; તમે છેતરાઇ રહ્યા છો. આગે આપકી મરજી.)

– ભરવરસાદમાં પાસપોર્ટ ઓફિસ સુધીનો ધક્કો સફળ રહ્યો. ત્યાંની સુંદર વ્યવસ્થા, ડોક્યુમેન્ટ ચકાસણી અને પોલિસ વેરીફિકેશનની પ્રક્રિયા બાદ લગભગ ૧૦-૧૨ દિવસમાં છોટુંનો પાસપોર્ટ આવી ગયો છે. નવો પાસપોર્ટ બનાવવાની સંપુર્ણ પ્રક્રિયાને ૧૦ માંથી ૮ પોઇન્ટ આપી શકાય. (આ ૨ પોઇન્ટ કેમ કાપ્યા? -આ સવાલ થતો હોય તો આપશ્રીએ પોલિસ વેરીફિકેશનની પ્રક્રિયા જાણી લેવી.)

– છેલ્લી અપડેટમાં વરસાદ જતો રહ્યો છે તેવી માહિતી હતી પણ તે પોસ્ટ બાદ ધારણા પ્રમાણે જ વરસાદે બીજો રાઉન્ડ શરૂ કરી દીધો. શરૂઆતમાં ઓછા વરસાદની ચેતવણી બાદ સિઝન દરમ્યાન વરસાદનું પ્રમાણ જોતા એકંદરે ચોમાસું સારું કહી શકાય એમ રહ્યું. જો કે નવરાત્રીમાં પણ વરસાદ હેરાન કરશે -તે અંદાજ ખોટો પડ્યો. (આ ઉપરથી સાબિત થાય છે કે કોઇએ મારી ધારણા અનુસાર ચાલવું નહી. જો આમ જાહેર ચેતવણી આપવા છતાંયે તમે મને અનુસરો અને આપને કોઇ નુકશાન થાય તો તેમાં અમારી જવાબદારી નથી, પણ જો ફાયદો થાય તો તેમાં યોગ્ય હિસ્સો લેવાની જવાબદારી અમે ચોક્કસ નીભાવીશું. જોયું, અમે કયારેક અમારી જવાબદારી પણ સમજીએ છીએ!)

– વડોદરાની જેમ કોઇ-કોઇ સ્થળે વરસાદે ચિંતા પણ ઉભી કરી તો બીજી બાજુ ભારે વરસાદે અચાનક જ કાશ્મીરની દશા બગાડી નાખી અને આજકાલ આસામમાં પણ પુરની સ્થિતિના સમાચાર છે.

– નવરાત્રી પુરી થવામાં હવે બે દિવસ બાકી રહ્યા છે પણ આ વર્ષે હજુયે રાસ-ગરબા કરવામાં મન માન્યું નથી. (કારણ? -રમેશભાઇને ખબર..) છેલ્લા દિવસો માટે પણ ખાસ ઉત્સાહ નથી, છતાંયે જો ઇચ્છા થશે તો એકાદ રાઉન્ડ રાસ-ગરબાનો ચાન્સ લેવામાં આવશે. નહી તો, નેક્સ્ટ નવરાત્રીમાં.. 🙂

– મોદી સાહેબ આજકાલ દુનિયાભરમાં ભારતનો ડંકો વગાડવા મથી રહ્યા છે. તેમનો આ પ્રયાસ ખરેખર સરાહનીય છે. આશા રાખીએ કે તેમની આ મથામણ ભારતને ફળે. ઓબામાભાઇના આમંત્રણને માન આપીને અને સંયુક્ત રાષ્ટ્રની મહાસભામાં હાજરી આપીને પ્રધાનમંત્રીજી આજે જ અમેરિકાની ‘રોકસ્ટાર’ યાત્રા પતાવીને સ્વદેશ પરત ફર્યા છે. (પ્રવાસી ભારતીય દ્વારા આયોજીત મેડિસન સ્ક્વેર ગાર્ડનનું એ ભાષણ ઇતિહાસમાં ખરેખર યાદગાર બની જશે. લખી રાખજો.)

– અમેરિકાની આ યાત્રા દરમ્યાન ત્યાંથી ભારતીય મીડીયાની ઓવર-રિપોર્ટીંગ અને પળેપળનું કવરેજ જોઇને નવાઇ લાગી. (નોર્મલ રિપોર્ટીંગ સુધી ઠીક લાગે પણ સાવ આમ પાગલપનની હદ સુધી તો ન જવાય ને… ખૈર.. અમેરિકાનું તો રામજાણે પણ મોદી સાહેબનું કદ આ લોકોએ ભારતભરમાં થોડું ઔર વધારી આપ્યું એ નક્કી છે.)

– લગભગ હવે બધા જાણે જ છે એટલે પેલા ક્રાંતિકારી ચેનલવાળા રાજદિપભાઇ સાથે બનેલી સુખદ ઘટનાનું લાંબુ વિવરણ કરતો નથી.. (એ ભાઇના લખ્ખણ જ એવા હતા કે…) અને આ યાત્રા દરમ્યાન અર્નબભાઇ ગોસ્વામીને મોદીના વખાણ કરતા જોઇને આંખમાં હરખના આંસુ ઉભરાઇ આવતા. ઇન્ડીયા ટીવી અને ઝી ન્યુઝવાળા તો જાણે આ મુલાકાત દરમ્યાન હરખઘેલા થયા’તા એમ કહી શકાય! (એમ તો મને પણ આ આખી ઘટના ઘણી ગમી છે.)

– વચ્ચે, ચીનના પ્રમુખ શ્રી શી’ભાઇ જીનપીંગ (ગુજરાતીમાં આમ જ લખાય) ચીનથી સીધા અમદાવાદ આવ્યા હતા. આપણાં નરેન્દ્રભાઇ તો જાણે વેવાઇ જાન જોડીને આવ્યા હોય એમ હરખાઇને દિકરીના બાપની જેમ ચીની પ્રમુખની આગતા-સ્વાગતા કરી હતી અને ઝુલે ઝુલાવ્યા હતા! (અરે.. ના ભાઇ ના. મોદી સાહેબે શી’ભાઇને રિવરફ્રન્ટ પર ઝુલે ઝુલાવ્યા તેનો મને કોઇ વાંધો નથી; પણ આ તો એવું છે ને કે કંઇક આડુંઅવળું શોધીને મુકીએ તો લોકોમાં આપણી’બી ઇજ્જત વધે અને આપણે ઇન્ટેલીજન્ટ લોકોમાં ગણાઇએ! 😉 )

– આજે ગાંધીજયંતિના દિવસે દેશના સ્વચ્છતાના આગ્રહનું સુંદર અભિયાન શરૂ કરવામાં આવી રહ્યું છે તો તેમાં યથાયોગ્ય ભાગીદાર બનવા સૌને આગ્રહ છે. જો ગંદકીને સાફ કરવામાં યોગદાન આપી શકો એમ ન હોવ તો કમ-સે-કમ આપ હવે ગંદકી નહી ફેલાવીને પણ સ્વચ્છતાના આ અભિયાનમાં આપનું યોગદાન આપી શકો છો. (નોંધ: મોબાઇલ-કોમ્પ્યુટરમાંથી વધારાના ફોટો-વિડીયો-ફાઇલ ડીલીટ કરવા -એ આ અભિયાનનો હિસ્સો ન ગણી શકાય.)

– લાગે છે કે હવે અપડેટ્સની ગાડી રાજકીય ટ્રેક ઉપર ચડી ગઇ છે. ઓકે. તો વધુ અપડેટ્સ નવી પોસ્ટમાં ઉમેરવામાં આવશે એવા શુભ વિચાર સાથે અહી એક અલ્પવિરામ લઇએ.

– આવજો.. ખુશ રહેજો..

# આ પોસ્ટ બે દિવસ પહેલા લખાયેલી પડી છે પણ તેને ડ્રાફ્ટમાંથી બહાર કાઢવામાં થોડો સમય થયો હોવાથી આજે કેટલીક જુની અપડેટ્સ જોવા મળશે. ફેશ અપડેટ્સ માટે જોતા રહો, મારો બગીચો! 🙂

Oct’12 : અપડેટ્સ-2

. . .

– આજે અપડેટમાં ઉમેરવા જેવું કંઇ ખાસ તો છે નહી, પણ થોડો સમય છે અને ‘New Post’ પર ક્લિક કર્યું જ છે તો બે-ચાર વાતોને ઉમેરી દઉ.

– નવરાત્રી પુરી થઇ અને હવે દિવાળી આવશે. (અને આજે બકરી ઇદ છે, જેઓ મનાવતા હોય તેમને શુભેચ્છાઓ.)

સાઇડ ટ્રેક: આ લગ્નો માટેના ખાસ મુરતના દિવસોમાં આ બકરી-ઇદને પણ એક સ્થાન આપવું જોઇએ. કેમ કે તેમાં ઘોડે ચડેલા બકરાએ(મુરતીયાએ) પણ બલિદાન આપવાનું હોય છે અને ત્યારે માહોલ પણ ઇદ જેવો જ હોય છે !!

– દાંડીયા-ગરબાના તાલે અને રાતે ઉજાગરા-દિવસે કામકાજ ના સાથે નવરાત્રીના દિવસો થોડા ઝડપથી પસાર થઇ ગયા હોય એમ લાગ્યું. (તે દિવસોનો થાક હવે જણાય છે.)

– સવારે દોડવાના નિત્યક્રમમાં તો નવરાત્રીના ચોથા દિવસથી જ શરીરના વહિવટીતંત્રએ ‘વચગાળાનો મનાઇહુકમ’ જાહેર કરી દીધો હતો, જે આજસુધી ચાલુ છે. (નવરાત્રીની આચારસંહિતા !!) જો કે જુની દિનચર્યાને ફરી અપનાવવાનો માનસિક ‘વટહુકમ’ હમણાં જ બહાર પાડવામાં આવ્યો છે જેનો અમલ આજે મધરાત્રીથી શરૂ કરી દેવામાં આવશે.

– વ્રજ બે દિવસમાં આવી રહ્યો છે તેની રાહ જોવાય છે. (તેની મમ્મી સાથે જ આવશે પણ અત્યારે તે ગૌણ મુદ્દો ગણાય ને… 😉 )

– ચુટણી આચારસંહિતાના કારણે ધંધાદારીઓની દિવાળીના દિવસોમાં ‘વાટ’ લાગેલી છે. (આજે થોડી રાહતના સમાચાર છે પણ તેનાથી મુશ્કેલ સ્થિતિમાં કોઇ ખાસ ફરક પડે એમ નથી લાગતું.) શ્રી ચુટણીપંચને આગ્રહભરી વિનંતી છે કે, આ આચારસંહિતાની પણ એક આચારસંહિતા બનાવો યાર… ચુટણીના કારણે વેપારીઓ પીસાઇ ને ચટણી બની રહ્યા છે.

– અને સરકારના ગૃહવિભાગ દ્વારા કાલે એક ખુલાસો કરવામાં આવ્યો છે કે; ગાંધીજી આપણાં દેશના રાષ્ટ્રપિતા નથી અને બંધારણ પ્રમાણે તેમને આવી કોઇ પદવી આપી શકાય એમ પણ નથી !! (લ્યો બોલો, હવે શું કહેશો?)

. . .