અપડેટ્સ – 181115

~ મારા તરફથી મને અને મારા બગીચાને વિતી ગયેલી દિવાળીની શુભેચ્છાઓ તથા નુત્તન વર્ષાભિનંદન! (નિર્જીવ વસ્તુ/જગ્યા સાથે આવો કોઇ શુભેચ્છા સંબંધ હું રાખું તો મને કોઇ પાગલ ગણી શકે છે. હા પણ.. અહીયાં ક્યાં કોઇ આવે છે તે મારે એટલું વિચારવું પડે!😆)

~ રજાઓમાં કચ્છની ટ્રીપ યાદગાર રહી. પરત આવીને બીજા દિવસે સાસરીયાના ગામની વાટ પકડીને ત્યાં જ વેકેશન પુરું કરવામાં આવ્યું. વ્રજ-નાયરા અને તેની મમ્મી ત્યાં રોકાઇ ગયાં છે, હું એકલો રીટર્ન આવીને ગઇકાલથી ધંધે લાગ્યો છું. (આ લગભગ દરેક વર્ષનો દિવાળી-નિત્યક્રમ છે; છોકરાંઓ નાનીના ઘરે રોકાશે, મેડમજી તેમની સાથે રહેશે અને અમે બધા પાછળ ધંધે લાગેલા રહીશું.)

~ પરત ફરતી વખતે હાઇ-વે પર જાણ્યું કે કેટલી ગાડીઓ અમદાવાદ બહાર વેકેશન કરવા ગઇ હતી! (અને આ દરેક ગાડીમાં કેટલાં વ્યક્તિઓ શહેર બહાર ગયા હશે તે વિશે અમે અંદાજ લગાવવાનો અસફળ પ્રયાસ પણ કર્યો.)

~ દર વર્ષનો અનુભવ છે કે જ્યારે આવો રજાનો માહોલ હોય અને રસ્તા પર ભારે ટ્રાન્સપોર્ટ/ટ્રક/ટ્રાવેલ્સ ઓછા હોય ત્યારે હાઇવે જાણે રેસીંગ ટ્રેક હોય તેમ પ્રાઇવેટ કાર દોડતી હોય છે. (લખનાર પોતે પણ હાઇવે પર સ્પીડના ચાહક હોવાથી આ વિશે કોઇ વિશેષ ટીપ્પણી નહી કરે. 🤐)

~ આ તો વચ્ચે દિવાળી આવી ગઇ એટલે થયું કે એક સીજનલ પોસ્ટ થઇ જાય. એમ તો ધ્યાનમાં જ છે કે શહેર-મુલાકાત અપડેટ્સની ચેઇનમાં હજુ એક પોસ્ટ બાકી છે જે ડ્રાફ્ટમાં હજુ બે દિવસ કાઢે એમ છે. (કારણમાં તો આળસ, આળસ અને માત્ર આળસ જ છે સાહેબ.)

~ આગળની પોસ્ટ ચેક કરતાં જાણ્યું કે તેમાં મૈસૂરની જગ્યાએ મસૂરી થઇ ગયું હતું. આખું શહેર બદલાઇ ગયું બોલો! હવે તો સુધારી લીધું છે. કદાચ મુળ મુળાક્ષરો સરખા હોવાથી લીમીટેડ કેપેસીટી ધરાવતા મારા મગજમાં જે તે સમયે કોઇ કેમીકલ લોચાના કારણે કન્ફ્યુઝન થયું હોઇ શકે છે. (હા તો એમ કંઇ બધે અમારી ભુલ ન હોય. #સેલ્ફ_રીસ્પેક્ટ)


મથાળું છબીઃ “સુર્યોદય” (નખત્રાણા, કચ્છ)
છબીકારઃ બગીચાનો માળી

[171024] અપડેટ્સ

~ સૌ પ્રથમ તો આજે મારા બગીચાને દિવાળીની શુભેચ્છાઓ… ભલે આ એક ઇ-સ્થળ હોય, પણ મારી માટે એક કાયમી વિસામો છે. મારા વિચારોનું ગોડાઉન છે. એમ તો કારખાનું અને પ્રયોગશાળા પણ છે. કંઇ જ ન હોવા છતાંયે આ મારી માટે ઘણું વિશેષ ઠેકાણું છે. (કોઇ-કોઇ વસ્તુંનું મુલ્ય આંકી ન શકાય.)

~ હું અહી મને મુકીને આગળ વધી જઉ છું પણ વિતેલો રસ્તો ફરી બતાવવાનું કામ આ બગીચો કરે છે. મારી કાલ સાથે મુલાકાત આ બગીચો જ કરાવે છે. મારી આસપાસની દુનિયામાં વસતી લગભગ દરેક વ્યક્તિ એમ સમજતી હશે કે ભુતકાળને આમ વળગીને રહેવાનો કોઇ મતલબ નથી. ખૈર, મને તેનાથી કોઇ ફરક નથી પડતો. (ફરક પડતો હોત તો તેઓ એ મને ઘણાં સમય પહેલા અટકાવી દીધો હોત.)

~ આ બધી વાતો ચાલતી જ રહેશે… મુળ વિષય એટલે કે આજની અપડેટ્સ પર આવીએ…

~ બંને બાળકો સ્વસ્થ અને ખુશ છે. મેડમજીને મારા દ્વારા અપાતા સમયમાં કાપ મુકાવાથી થોડી નારાજગી છે પણ તે વધારે સમય નહી રહે તેની મને ખબર છે. (તેના સપોર્ટની મને જરૂર રહેશે જ.) દરવર્ષની જેમ આ વર્ષે પણ નાના-નાની ને દિવાળી-વેકેશન-સ્ટૉપ બનાવ્યા છે અને અમે ઘરે એકલા છીએ. (વ્રજ-નાયરા વગરનું ઘર ઘણું ખાલી-ખાલી લાગે છે.)

~ નવું કામ નવી ચેલેન્જ લઇને ઉભરી રહ્યું છે. બધી ચેલેન્જને સ્વીકારીને આગળ વધવું એ જ એકમાત્ર વિકલ્પ છે અત્યારે એટલે અન્ય બિનજરૂરી વિચારોને ઇગ્નૉર કરવામાં જ મારી ભલાઇ છે.

~ અવ્યવસ્થા હવે બદલાવ બાદ ધીરેધીરે નવી વ્યવ્સ્થાનું સ્વરૂપ લઇને વ્યવસ્થિત રીતે ગોઠવાઇ રહી છે. લગભગ બધું જ ધાર્યા મુજબ ચાલી રહ્યું છે તેની ખુશી છે. અંદાજ કરતા સમય થોડો વધારે જાય એમ લાગે છે અને નાની-મોટી સમસ્યાઓ વારંવાર અટકાવે છે પણ સારી વાત એ છે કે મને રસ્તાઓ મળી જાય છે. (રસ્તો મળતો જાય તો કોઇ કામમાં થાક ન લાગે.)

~ લાઇફ ક્યારેક આપણને એવી જગ્યાએ લાવી ને મુકે છે જ્યાંથી આપણે કંઇ કરતા નથી હોતા છતાંયે આપણા દ્વારા જ બધું થતું હોય છે.. અથવા તો એમ કહી શકાય કે હવા જ આપણને ખેંચીને લઇ જતી હોય છે અને આપણે હવાની દિશામાં ખેંચાતા જઇએ છીએ. (બસ હવે, બધે વિસ્તારથી સમજાવાનું ન હોય યાર..)

~ અનિશ્ચિતતાનો આ સમયગાળો હવે અંતિમ તબક્કામાં છે. તેના પછી એક નિશ્ચિત જવાબદારી જણાઇ રહી છે. અઘરું છે તે નક્કી છે. પણ ‘બધું થઇ જશે’ તેનો વિશ્વાસ પણ અડગ છે. (આટલો કોન્ફીડન્ટ તો હું ક્યારેય નહોતો.)

~ આ દિવાળી બિલકુલ અલગ રહી. કામ અને વ્યસ્તતા તો હતા જ છતાંયે આ વખતનો ઉત્સાહ અલગ હતો. હજુ પણ તે છે જ. પાચમ પર મુહુર્ત કરવાના ન્યાયે આવતી કાલથી કામકાજ ફરી શરૂ થઇ રહ્યા છે. (ક્યારેક મને પણ હું વિચિત્ર પ્રકારનો નાસ્તિક લાગુ છું! પોતાની જાત અને કુદરતી નિયમ સિવાય કોઇનામાં વિશ્વાસ નથી કરતો છતાંયે આ બધા નખરાંમાં સાથ આપુ છું.)

~ હું મારામાં બહુ જ મોટો ફરક પણ જોઇ રહ્યો છું. ઘણાં સમય પહેલાં અનુભલેવી કોઇક સંવેદનાઓ મન ફરી અનુભવી રહ્યું છે. દિલમાં એક નવી જ સમાંતર દુનિયા આકાર લઇ રહી છે. હા, યાદીમાં એક નવી ઇચ્છા પણ ઉમેરવામાં આવી છે. (આ ઇચ્છા તો દિવાળી પહેલા પુરી થાય એમ હતી પણ મને સમય ન મળ્યો.)

~ કોઇને પણ સરળતાથી માફ કરી દેવાની પ્રકૃતિ ધરાવતો મારો સ્વભાવ મને બહુ જ મદદ કરી રહ્યો છે! અને હા, થેન્કયું જીંદગી…

અપડેટ્સ-45 [Oct’14]

– સૌ પ્રથમ તો સૌને વિતી ગયેલી દિવાળીની ભુલાઇ ગયેલી શુભેચ્છાઓ અને નવા વર્ષની મીઠી-મધુરી શુભકામનાઓ! (દેવ-દિવાળી સુધી દિવાળીની શુભેચ્છાઓ આપી શકાય -એવું અમે કયાંક વાંચેલું.)

– આજે સરદાર પટેલનો હેપ્પી બડ્ડે છે. આઝાદીના ઘડવૈયાઓમાં સરદાર મને સૌથી પ્રિય. પણ હંમેશા ગાંધી પરિવારની ભક્તિમાં તલ્લીન કોંગ્રેસ દ્વારા વર્ષોથી તેમની ઉપેક્ષા થતી જોઇને વિચાર આવતો કે લોખંડી સરદાર સાવ ભુલાઇ તો નહી જાય ને…  પણ, મોદીસાહેબે જે રીતે તેમને કોંગ્રેસ પાસેથી હાઇજેક કર્યા છે તે જોઇને લાગે છે કે સરદાર પટેલ કે અચ્છે દિન આ ગયે!

– આ દિવાળી એકંદરે શાંત અને નિરાંતવાળી દિવાળી રહી. છોટું માટે તેના યોગ્ય નાની-મોટી બે-ચાર વસ્તુઓ લેવામાં આવી હતી પણ તેના અગમ્ય ડરના કારણે તેણે કોઇને માન ન આપ્યું. હજુ તેને મોટો થવા દઇએ તો ઠીક રહેશે, એમ વિચારીને અમે પણ તેને વધુ આગ્રહ ન કર્યો. તેને દિવાળીની મીઠાઇઓ વધારે ગમી!

– વ્રજને કોઇ ‘પ્લે-સ્કુલ’માં જોડીને ઠેકાણે પાડવાનો વિચાર ઘરમાં ચાલી રહ્યો છે. જો કે હું તેનો વિરોધ કરી રહ્યો છું. કારણ? – હજુ તો એ નાનો છે યાર. જો કે તેની સમજણ અને બકબક જોઇને કોઇ કહી ન શકે કે તે હજુ બે વર્ષનો જ હશે. હવે તો એ બૉસ અમને પણ સલાહ આપતા હોય છે કે શું કરાય અને શું ન કરાય. બૉલો, અમારું શીખવેલું અમને સમજાવે!

– આજથી પાંચ વર્ષ પહેલા ૩૦ ઑક્ટોબરના દિવસે મેં મારી જાતને રાજીખુશીથી એક ખાસ વ્યક્તિ સાથેના બંધનમાં જોડી હતી (સામે પક્ષે પણ એવું જ હતું!) તેને ગઇકાલે પાંચ વર્ષ પુરા થયા! (અરે હજુ હમણાં જ તો પરણ્યા’તા અને તેને આટલા બધા દિવસ થઇ ગયા કે!!! -આવી લાગણી મારા ભુલક્કડ સ્વભાવને થાય તે સ્વાભાવિક છે.)

– એટલે પાંચ વર્ષથી જળવાયેલ આ બંધનને આજસુધી સુંદર રીતે નિભાવી શકવાની ખુશીમાં તથા મારી સાથે રહીને સળંગ પાંચ વર્ષ સુધી મને સહન કરી શકવાની મેડમજીની સહનશક્તિના સન્માનમાં ગઇકાલે કેક કાપીને ઉજવણી કરવામાં આવી. (જાણવાજોગ- અમારા ઘરમાં કેક ગમે તે કારણે આવે પણ તેને કાપવાનો અબાધિત અધિકાર માત્ર છોટું પાસે છે.) અન્ય સેલિબ્રેશન માટે સમય-સંજોગ અને યોગ્ય વિકલ્પના અભાવે ના-છુટકે કાલે SRKની ‘હેપ્પી ન્યુ યર’ ફિલ્મ નિહાળવામાં આવી. (ફિલ્મ એટલી ખરાબ પણ ન લાગી.)

IMG_20141007_135602736– થોડી જુની અપડેટ: ફ્લીપકાર્ટના કોઇ મોટા દિવસે અમે પણ તે વેબસાઇટ પર થોડો ટાઇમ ચોંટી રહ્યા હતા પણ… કંઇ ખાસ દિવસ ન જણાતા આખરે ચેતન ભગતનું એક લેટેસ્ટ પુસ્તક થોડું સસ્તામાં ખરીદીને તેમના એ ફ્લૉપ દિવસમાં અમારો યથાયોગ્ય ફાળો આપ્યો. (જો કે બીજા દિવસે તેમણે પુસ્તક સાથે માફીનામું મોકલીને થોડું દર્દ ઓછું કર્યું. બધા જાણે છે કે અમારું હ્રદય ઘણું નરમ છે, તેમને માફ કરી દીધા.)