અપડેટ્સ – 52

# ૨૦૧૬ ના વર્ષની આ ચોથી પોસ્ટ છે. (ગણવા ન જતા, નહી તો આ પાચમી લાગશે.) પાચમાં મહીનામાં ચોથી પોસ્ટ! (બહોત ના ઇન્સાફી હૈ ના?)

# સમયના કોઇ કાળમાં ‘રાજકારણ વિશે ન લખવું’ એવું નક્કી કર્યું’તુ અને તે નક્કી કર્યા પછી શું લખવું એ જ નક્કી નથી થતું. એમ તો વિષય અને ઘટનાઓની કમી નથી પણ કેમ જાણે અહી કંઇ ઉમેરવા માટે મેળ જ નથી આવતો. (writer’s block આને જ કહેતા હશે, પણ હું તો કોઇ એંગલથી writer પણ નથી! તો પછી આ block કેમ હશે?)

# ઘણીવાર થયું કે કંઇક લખવામાં આવે તો આ જગ્યા પણ જીવંત રહે. ખૈર, આજે કલમ (એટલે કે કી-બોર્ડ) હાથમાં લીધી જ છે તો બે-ચાર લાઇન ચોક્કસ લખીશ. (એમ લખવા બેસીયે તો પાછું કંઇક લખાઇ પણ જાય હોં)

# અમારે કોઇ રીતે વેકેશન ન હોય તો પણ વ્રજના કારણે અત્યારે વેકેશન ટાઇમ ચાલી રહ્યો છે. એ સાહેબ તો નાના’ના ઘરે જલ્સા કરે છે તથા મેડમજી પણ તેમને સાથ આપી રહ્યા છે. અને અમે અહીયાં એકલાં રહેવાની મજા ઉઠાવી રહ્યા છીએ. (એકલા રહેવાની પણ એક અલગ મજા હોય છે પણ જાહેરમાં બતાવાય નહી.)

# એકલા રખડવાના શોખીન હોવા છતાં અત્યારે સોલિડ ગરમીની મૌસમના કારણે ઓફિસમાં ભરાઇ રહેવું બેહતર હોય છે. મારી માટે ગરમી એટલી અઘરી ન હોય પણ આ વખતે કંઇક વધારે જ છે એટલે સાચવવું સારું. (સાંજે ૭ વાગ્યા સુધી પણ લૂ લાગતી હોય છે!)

# એમ તો આ ગરમી શરૂ થાય એ પહેલા અમે રાજસ્થાનમાં જયપુરનો પ્રવાસ કરી આવ્યા’તા. ગરમીની શરૂઆત હતી ત્યારે એટલે ફરી શક્યા, હવે જવાની હિંમત ન કરાય. (અરે, આ પ્રવાસ વિશે એક આખી પોસ્ટ બની શકે એમ છે! કાલે જ વાત.)

# વ્રજની નર્સરી સ્કુલ જૂન મહિનાના પ્રહેલા અઠવાડીયામાં જ સ્ટાર્ટ થઇ જશે એટલે તે પહેલા તેને લેવા માટે મને સાસરે જવું પડશે. (સાસુએ પણ આમંત્રણ આપ્યું છે કે – કુછ દિન તો ગુજારીએ સસુરાલ મેં!)

# મારી કોલેજ પુરી થયા પછી ઘણાં મોટા બ્રેક પછી સ્કુલીંગ સાથે મારો પરિચય થઇ રહ્યો છે. વ્રજની સ્કુલ બુક્સ અને સ્કુલના નખરાંઓ જોઇને લાગે છે કે અમે ભણતાં’તા એ આ દેશ નહોતો! (સાલું, બઉ બદલાઇ ગયું છે બધું!)

Screenshot_2016-05-20-20-15-03# બસ આજે આટલી વાતો ઠીક રહેશે. આગળની (એક્સ્ટ્રા) નાનકડી પોસ્ટ માત્ર સ્પાર્ક માટે જ હતી અને તેનો ફાયદો પણ થયો. (ખરેખર આ ‘બ્લૉક’ જેવું કંઇક હોય છે ખરું!)

સાઇડટ્રેક: આ writer’s block નું ગુજરાતી શોધવા પ્રયત્ન કર્યો પણ કોઇ નક્કર જાણકારી ન મળી. ગુગલભાઇના મતે તેને ‘લેખક માતાનો બ્લોક’ કહેવાય એવું જાણવા મળ્યું! શું તેને ‘લેખન શૂન્યતા’ કહી શકાય?

અપડેટ્સ-40 [May’14]

– અગાઉ દેશ-ચુટણી-રાજકારણ અને જન્મદિવસની અપડેટ્સ વચ્ચે રોજબરોજની વાતો લગભગ ભુલાઇ ગઇ છે એટલે આજે તેને પ્રાથમિકતા આપવામાં આવી છે; પરંતુ તેની સાથે-સાથે કેટલીક જરૂરી રાજકીય વાતોને પણ અહી જ સમાવી લેવામાં આવી છે. (શું ખબર… ફરી આવો સમય મળે કે ન મળે…)

– શરૂઆત કરીએ એક ખાસ મુલાકાતથી… થોડા દિવસ પહેલા ગુજરાતી-બ્લૉગીંગ-દુનિયાના મહામહિમ અને અમારા બ્લૉગીંગ માર્ગદર્શક-આદર્શ એવા શ્રી કાર્તિકભાઇ સાથે અમદાવાદમાં જ રૂબરૂ મુલાકાત કરવામાં આવી. તેમના વ્યસ્ત કાર્યક્રમ વચ્ચે મારી માટે થોડો સમય ફાળવવા બદલ સંસ્થા તેમનો આભાર વ્યક્ત કરે છે. (રૂબરૂ મુલાકાતની શ્રુંખલામાં આ લગભગ ત્રીજા વ્યક્તિને મળવાનું થયું હશે.)

– કાર્યક્ષેત્રની દ્રષ્ટિએ બે સાવ ભિન્ન ક્ષેત્રના વ્યક્તિઓ મળે ત્યારે વાતચિત કયા મુદ્દે કરવી તે પ્રશ્ન ઉદભવે તે સ્વાભાવિક ઘટના છે. જો કે મારી માટે વાતચિત કરતાં આ મુલાકાત વધુ જરૂરી હતી એટલે મને તો કોઇ વાંધો નહોતો પણ કાર્તિકભાઇની સમસ્યા અંગે હું ચોક્કસ કહી ન શકું. અમે એકબીજાના મુખ્ય વિષયની થોડીક વાતો કરી. (થોડીક એટલા માટે કે તેમના વિષયમાં મને ટપ્પી ન પડે અને મારા વિષયની બોરિંગ વાતોથી તેમની દુર રાખવાનો મારો નેક ઇરાદો!) એટલે મારા ચિત્ર-વિચિત્ર વિચારોની સાથે-સાથે અમે પરિવાર-દેશ-દુનિયા અને આસપાસના લોકોની ‘પંચાત’ વધુ કરી. (આ મુલાકાત દરમ્યાન આદત મુજબ હું જ વધારે બોલ્યો હોઇશ અને તેમને બોલવાનો ઘણો ઓછો ચાન્સ આપ્યો હશે એવું મારું માનવું છે.)

– ટેણીયાંને અને તેની મમ્મીને બે દિવસ પહેલા જ ઘર-ભેગા કરવામાં આવ્યા છે. (વેકેશન પુરું થયું!) અને સુનું-સુનું ઘર ફરી ગાજતું થઇ ગયું છે. વ્રજ હવે નાના-નાના સવાલોના જવાબ આપતા આવડી ગયું છે. આપણે જે બોલીયે તેના પાછળના શબ્દો રીપીટ કરવામાં પણ છોટું-સાહેબ માસ્ટર થઇ ગયા છે! લગભગ દરેક શબ્દો ચોખ્ખા બોલે છે. (જો કે ચમચીને તો હજુપણ તે ‘મન્ચી’ જ કહે છે! -આ શબ્દથી યાદ આવ્યું કે તેની ભાષામાં બોલાતા શબ્દોનું લિસ્ટ બનાવવાનું ભુલાઇ જાય છે.)

– પોણા બે વર્ષનો આ ટેણીયો હવે અમને સવાલ પણ પુછે છે! કોઇ પણ નવી વસ્તું દેખે એટલે તેની તરફ આંગળીથી ઇશારો કરીને તેનો સવાલ તૈયાર જ હોય કે, “પપા, આ શું છે?” (જો કે અત્યારે તો કંઇ પણ જવાબ આપી દો, સ્વીકારી લે છે.)

– લગભગ ૨૨ દિવસ સુધી એકલા રહેવાનો સૌથી મોટો ફાયદો એ રહ્યો કે છેલ્લા છ મહિના દરમ્યાન ચુકી જવાયેલી ઘણી ફિલ્મને જોઇ લેવાઇ. એમ તો કામકાજમાં પણ વ્યસ્તતાનું પ્રમાણ વધારે રહ્યું. હવે થોડા દિવસોમાં દરેક વ્યક્તિ/પેઢીનો ઇન્કમટેક્ષ ભરવાનો હોવાથી એકાઉન્ટને ફાઇનલ કરવાની તૈયારીઓ ચાલી રહી છે એટલે દિવસો કાગળીયા વચ્ચે વ્યતિત થઇ રહ્યા છે.

– છેલ્લા અઠવાડીયામાં જ રવિન્દર સિંઘના બે પુસ્તક ( I Too Had a Love Story -&- Can Love Happen Twice?) ને ઉપરાઉપરી વાંચવામાં આવ્યા. પુસ્તકો માટે હવે મારા બગીચામાં એક અલગ વિભાગ બનાવવામાં આવ્યો છે જેમાં વાંચવામાં આવેલા પુસ્તક અંગે મારા મંતવ્યો રજુ કરતા રહેવાનો વિચાર છે. નવા વિભાગ માટે જુઓ- અહી [વાચકજોગ: આ વિભાગની અપડેટ્સની જાણકારી ઇમેલથી મળી શકે એમ નથી એટલે નવી વાતની જાણકારી ફેસબુક કે ગુગલ-પેજ દ્વારા આપવામાં આવશે.]

– આજકાલ ગરમીનો પારો 44-45 ની આસપાસ રહેવાના કારણે સખત ત્રાસદાયક વાતાવરણ છે. સવારે વહેલા અને રાત્રે થોડી-થોડી ઠંડક રહે છે પણ તે સિવાય આખો દિવસ સખત બફારો અનુભવાય છે. બપોરે 1 થી 5 દરમ્યાન તો બહાર નીકળી ન શકાય એવી હાલત છે. હવે તો વરસાદનો ઇંતઝાર છે. (કયારે વરસાદ આવે ને… કયારે મન મોર બની થનઘાટ કરે…)

– મારા આ બગીચાના રૂપરંગમાં ફરી બદલાવ ન કરવાનો વિચાર કર્યો હોવા છતાં એક નાનકડો ચેન્જ કરવામાં આવ્યો છે. હવેથી બેકગ્રાઉન્ડમાં લીલો-લીલો બગીચો જોઇ શકાશે. (આ હરિયાળા બેકગ્રાઉન્ડ વિના મારો બગીચો મને સુકો-સુકો લાગતો હતો!)

– આખરે દેશમાં અબકી બાર મોદી સરકાર આવી જ ગઇ. જેમ ફેસબુક પર લોકોને કહેતા સાંભળ્યા છે એમ હું કહી શકું છું કે નરેન્દ્ર મોદીની જીત માટે અમે પણ સચોટ આગાહી કરી હતી. જો કે હું અહીયાં તે બધું કહીને આપબડાઇ કરવામાં માનતો નથી એટલે કંઇ જ કહેતો નથી. (જોયું! ના-ના કહેતા કહી પણ દીધું છે! 😉 અને જો કોઇને ખાતરી કરવી હોય તો નવેમ્બર-2013 થી ચુટણી પરિણામ પહેલાની વાતો જોઇ લેવી.)

– આ વખતે પ્રથમવાર દેશના વડાપ્રધાનની સપથવિધિનો શાનદાર સમારોહ નિરાંતે નિહાળવામાં આવ્યો. જો કે એક-ને-એક સપથ અલગ-અલગ વ્યક્તિઓના મુખે સાંભળીને ત્યાં પધારેલા મહેમાનોની જેમ મનેય કંટાળો આવતો હતો પણ સપથવિધી બાદ નવા-નવા વડાપ્રધાનના મુખે કંઇક સાંભળવાની લાલચે ટીવી સામે બેસી રહ્યો હતો પણ છેક સુધી તેઓ ન આવ્યા. (વડાપ્રધાન બન્યા પછી અત્યાર સુધી મોદી’જી નું કોઇ જાહેર ભાષણ સાંભળવા નથી મળ્યું. જો કે સુત્રોથી મળતી જાણકારી અનુસાર બે દિવસમાં વડાપ્રધાન દેશની પ્રજાને સંબોધન કરશે એવા સમાચાર છે.)

– સપથવિધી બાદ મોદીસરકાર જે રીતે કામકાજ કરી રહી છે તે જોતા લાગે છે કે અચ્છે દિન જલ્દ હી આ જાયેંગે.. જો કે કેટલાક લોકોને તેમાં શંકા પણ છે. (આ કેટલાક લોકો આજકાલ કોંગ્રેસી તરીકે ઓળખાય છે! આમ તો હવે સરકારના દરેક કાર્યોમાં શંકા કરવી તેમની ફરજ પણ છે.)

– દેશના પડોશીઓ સાથે જે રીતે નિકળતા કેળવવામાં આવી રહી છે તે પ્રક્રિયાને અમે સંપુર્ણ ટેકો આપીએ છે. અમે અગાઉ જણાવી ચુક્યા છીએ કે આસપાસના દેશ સાથેના વિવાદિત મુદ્દે વાતચિત એ શ્રેષ્ઠ વિકલ્પ છે. પણ જો સામે પક્ષે શાંતિ-પ્રયાસના બદલે વારંવાર છમકલાં કરવામાં આવે તો યુધ્ધને અમે છેલ્લો વિકલ્પ પણ ગણીયે છીએ. (તમને એમ લાગશે કે હું તો એવી રીતે મારો મત જણાવી રહ્યો છું કે જાણે અમારા આ મતથી કોઇ મોટો ફરક પડવાનો હોય!)

– મારી ધારણા મુજબ જ ગુજરાતમાં હવે મોદી-સરકારની જગ્યાએ પટેલ-સરકાર આવી ગઇ છે. (જુઓ- છ મહિના પહેલાની આગાહી) મુખ્યમંત્રી તરીકે નરેન્દ્ર મોદીના પ્રમાણમાં આનંદીબેન થોડા કમજોર ચોક્કસ છે પણ તેમની ઉપર સાહેબનો હાથ રહેશે એટલે વાંધો નહી આવે એવું અમારું માનવું છે. (આનંદીબહેનની ગણના કડક વ્યક્તિ તરીકેની છે પણ રાજકારણમાં કડક વ્યક્તિત્વ કરતાં સમય અનુસાર નિર્ણય લઇ શકે એવી પ્રેક્ટિકલ વ્યક્તિ વધુ સફળ રહે છે.)

– રાજકારણ વિશેની અપડેટ્સ તો ઘણી છે પણ આજે અહી અટકીએ તે ઠીક રહેશે. બીજી કોઇ અપડેટ્સ ધ્યાનમાં આવતી નથી અને સંપુર્ણ કોમર્સિયલ ઇવેન્ટ એવી IPL માં મને જરાયે રસ ન હોવાથી તેની કોઇ જ વિગત મારા બગીચામાં ઉમેરવાની જરૂર લાગતી નથી. (ચોખવટ: અહી માત્ર અમારું જ શાસન હોવાથી અમને રસ હોય એ જ માહિતી ઉમેરવામાં આવે છે.)

અને છેલ્લે એક #કોશ્ચન….


#સુધારો: વંચાયેલાં પુસ્તક વિશેના વિભાગમાં નવી પોસ્ટની જાણકારી હવે બગીચા સાથે જોડાયેલા મિત્રો માટે ઇમેલ દ્વારા ઉપલબ્ધ છે. જો અન્ય કોઇ મારા બગીચામાં ઉમેરાતી નવી વાતોને ઇમેલથી મેળવવામાં રસ ધરાવતા હોવ તો તે માટે અહી જમણી બાજુમાં ‘subscribe’ નો વિકલ્પ ઉપલબ્ધ છે. આભાર.

એપ્રિલ’૧૩ : અપડેટ્સ-૨

. . .

– આખરે બ્લડ-યુરીન-એક્સરે-સોનોગ્રાફી વગેરે વગેરે રીપોર્ટ આવી ગયા! ડૉકટરે દરેક ટેસ્ટના રિપોર્ટને ગંભીરતાથી ચકાસ્યા અને પછી વધુ ગંભીર બન્યા! (રિપોર્ટ જોયા બાદ ડૉક્ટરનો બદલાયેલો ચહેરો અને મને બહાર મોકલીને પપ્પા સાથે ‘વધુ વાત’ કરવી – આ બંને ઘટનાથી મને પણ ખ્યાલ આવી ગયો કે રિપોર્ટમાં કંઇક સીરીયસ મેટર છુપાયેલી લાગે છે! 🙂 )

– જો કે પછી તો મેં બધુ જાણી જ લીધું કે આખરે હકિકત શું છે. (યાર, મને તો મારી બિમારીનો ખ્યાલ હોવો જોઇએ ને!) ડૉક્ટરને એમ હતું કે હું સાંભળીને ગભરાઇ જઇશ એટલે મને બહાર મોકલી દીધો હતો.

Read more