1st time – A video update!

મારા બગીચાના ઇતિહાસમાં અમે પ્રથમવાર રજુ કરવા જઇ રહ્યા છીએ..
એક સંપુર્ણ પારિવારિક ચલચિત્ર. (એટલે કે વિડીયો!)

તો… પ્રસ્તુત છે, શ્રીમાન વ્રજનો લુંગી ડાન્સ!

લુંગી ડાન્સ આવો ન હોય એવી ટિપ્પણી કરવી નહી. – લિ. હુકમથી

bottom image of blog - એક સંપુર્ણ પારિવારિક ચલચિત્ર

અપડેટ્સ-46 [Dec’14]

– આજે અહી આવીને એમ લાગે છે કે જાણે હું કોઇ લાંબા વેકેશન ઉપર ગયો હતો! (કોઇને શંકા હોય તો જાણી લેશો કે તે માત્ર એક અફવા છે.) આટલા દિવસ ક્યાં ગયા તેની ચોખવટ કરી શકાય એવું કોઇ બહાનું પણ અત્યારે યાદ નથી આવતું. (હા, હું કોઇને કોઇ બહાનું તો શોધી જ લઇશ.)

– આમ તો ડિસેમ્બરમાં અહી કંઇ લખવા આવીશ એવી શક્યતાઓ નહિવત જ હતી, પણ આજે અચાનક નિંદ્રાદેવીના શ્રાપ થકી મને અહીયા કંઇક ઉમેરવાનો મોકો મળ્યો! જે થયું તે, હવે પરમ કૃપાળુ નિંદ્રાદેવીની જય હો! (ના.. હું ઉંઘમાં નથી લખી રહ્યો; આ તો ઉંઘ નથી આવતી એટલે થયું કે લાંબા સમયે પણ બે-ચાર વાતો નોંધી લેવામાં નુકશાન તો નથી જ ને.)

– કેટલાય દિવસો ગયા અને ન જાણે કેટલી રાત વિતી ગઇ.. આમ ને આમ લગ્નની એક આખી સિઝન પુરી થઇ ગઇ.. (મસ્ત લાઇન છે ને? અરે, ના ગમી? ઠીક છે; તો શેર-શાયરી વગર જ વાતો કરીએ.)

– દરવર્ષની જેમ આ વખતે પણ ભરપુર લગ્નો રહ્યા. લગ્નગાળાના કેટલાક દિવસો તો પોસ્ટમેનની જેમ કવર/ગિફ્ટ-પાર્સલ પહોંચાડવામાં જ ગયા હશે એમ કહી શકાય. (અને આ દોડભાગમાં મારું વજન પણ ત્રણ-ચાર કિલો ઘટી ગયું છે, બોલો!)

– કામકાજ સામાન્ય ચાલી રહ્યા છે. લગભગ દરેક સેક્ટરમાં મંદીનો માહોલ જણાય છે. મારા રેગ્યુલર બિઝનેસથી અલગ એક નવો પ્રોજેક્ટ શરૂ કરવાનો વિચાર છે. કદાચ આ નવું કામ હોવાથી મને અત્યારે તેના પ્રત્યે વધુ ઉત્સાહ છે. (આ ઉત્સાહ કાયમ જળવાઇ રહે તો સારું!)

– છોટુંની મસ્તી અને મારી આળસ હજુયે એક જ દિશામાં આગળ વધી રહ્યા છે. છોટુંની મસ્તી લાંબી ચાલ્યા રાખે તેનો વાંધો નથી, પણ મારો આળસુ સ્વભાવ છોડવામાં હું હજુયે કેમ આળસ કરી રહ્યો છું તેનું કારણ મને જ સમજાતું નથી. (કદાચ તેની પાછળ પણ મારો આળસુ સ્વભાવ જ જવાબદાર હશે! 😀 )

– iPhoneમાં iOS8ના નવા સેટીંગ્સ પ્રમાણે એરટેલ 3G સર્વિસને 2G માં બદલી શકાતી નહોતી અને મારા મતે તેનો ભોગ બિચારા મોબાઇલની નાજુક બેટરીને બનવું પડતું હતું. મોબાઇલના આ અપાર દુઃખને દુર કરવા માટે વારંવાર ફરિયાદ છતાંયે નેટવર્ક સેટીંગ્સમાં ફેરફાર કરવામાં અસમર્થતા જતાવવા બદલ નાછુટકે એરટેલની સુવિધાને વિદાય આપવામાં આવી અને દુરભાષ-સંખ્યા સ્થળાંતર યોજનાનો લાભ લેવામાં આવ્યો. (અહી ફોન બદલવાનો વિકલ્પ પણ હતો પરંતુ અમે અમારા ફોન પ્રત્યે વધુ લાગણી ઘરાવતા હોવાથી સર્વિસ-પ્રોવાઇડર બદલવાનો વિકલ્પ પસંદ કર્યો.)

– થોડા દિવસો પહેલા ઠંડીને શોધવા દિવો લઇને નીકળવું પડે એવી સ્થિતિ હતી પણ અચાનક જ ઠંડીએ તેનો સોલિડ રંગ બતાવ્યો છે. અમદાવાદમાં આટલી ઠંડી ભાગ્યે જ અનુભવી શકાય. આજકાલ વહેલી સવારે સાબરમતી ઉપરના કોઇપણ પુલ ઉપર ઉભા રહીને ઉગતા સુરજની દિશામાં જોવા મળતું ધુમ્મસ-ભર્યું દ્રશ્ય દિલમાં કાયમી વસી જાય એટલું સુંદર હોય છે. (જો કે આ દ્રશ્ય જોવામાટે દ્રષ્ટિની સાથે થોડી હિંમતની પણ જરૂર પડશે!)

– સાહસિક લોકોએ આ મૌસમમાં રિવરફ્રન્ટ પર વહેલી સવારે જોગીંગનો લાભ લેવો જોઇએ એવું અમારું સુચન છે. (જાહેર જનતા નોંધ લે કે અમારા સુચનનો અમલ કરવા અમે પોતે બંધાયેલા નથી.)

આનંદી-સરકાર (પટેલ-સરકાર કરતાં આનંદી-સરકાર વધુ સરસ લાગે છે ને!) વાઇબ્રન્ટ સમિટની તૈયારીમાં અત્યારે પુરજોશમાં લાગેલી છે. અમારી આસપાસ ના દરેક રોડ રિ-સરફેસ થઇ રહ્યા છે અને ફુટપાથ-ડિવાઇડર નવા શણગાર લઇ રહ્યા છે! અમદાવાદ એરપોર્ટ અને ગાંધીનગર ને જોડતા રોડ પર પણ ઠેર-ઠેર સરકારી હોર્ડિંગ્સ સજી રહ્યા છે. ટીવી-રેડીયોમાં જાહેરાતો ચાલી રહી છે, આમંત્રણ મોકલવામાં આવી રહ્યા છે અને નિમંત્રણ સ્વીકારવામાં આવી રહ્યા છે! (ગમે તે કહો પણ પોસ્ટરના આનંદીબેનમાં મોદીસાહેબ જેવો વટ દેખાતો નથી.)

– ઉપર એક રાજકારણની વાત આવી જ ગઇ છે તો તેમાં થોડો પણ ઉમેરો કરી લઉ. માનનીય મોદી સાહેબને હરિયાણા અને મહારાષ્ટ્રમાં શાનદાર દેખાવ માટે તથા ઝારખંડમાં વિજય અને જમ્મુ-કાશ્મીરમાં સફળતા મેળવવા બદલ અભિનંદન! વિધાનસભા બાદ આ ચાર રાજ્યોના ઇલેક્શન પર નજર નાખીએ તો ચોક્કસ દેખાશે કે દેશમાં રાજનીતિની દિશા બદલાઇ રહી છે. જો કે આ દિશા બદલવામાં અને બીજેપીને આગેકુચ કરવામાં મદદરૂપ થવામાં કોંગ્રેસનો ફાળો પણ ઘણો મોટો છે. (કોંગ્રેસે તેના ભુતકાળના વહિવટ અને એક પરિવારની ભક્તિના નશામાં પોતાના પગ પર કુહાડો મારીને પોતાની જાતને રેસમાંથી બહાર કરી દીધી છે અને બીજેપી માટે રસ્તો ઘણો સરળ કરી આપ્યો છે.)

– અત્યારે સવાર/રાત્રીના 3:30 થઇ રહ્યા છે. રાત ટુંકાઇ રહી છે પણ વાતો લાંબી થતી જતી હોય એમ લાગે છે. કાલે (કેલેન્ડર પ્રમાણે આજે) ઘણાં જરૂરી કામ પણ છે એટલે અત્યારે શરીરને આરામ આપવો એ પ્રાથમિકતા જણાઇ રહી છે.

– તો.. નવી વાતો માટે ફરી એક નવા પાનાનો ઉપયોગ કરવામાં આવશે એવા વિચાર સાથે.. અલવિદા.

ખુશ રહો!


હેડર ફોટોઃ ‘રેન્ડમ’ લગ્નસ્થળ ડેકોરેશન.

Book: Romance on facebook

Romance on facebook By Amrita Priya

પુસ્તકનું નામઃ Romance on facebook
લેખીકા: Amrita Priya

આ પુસ્તકનું ટાઇટલ વાંચીને આ નવલિકામાં લગભગ દરેકને રસ પડશે એમ લાગે છે! કેમ કે આ ટાઇટલમાં જ એવા શબ્દો છે કે દરેક ઉંમરની વ્યક્તિને તે વિશે જાણવાની સ્વાભાવિક જીજ્ઞાસા હોય જ!

આપ આ પુસ્તકના નામ ઉપરથી વધુ કંઇ વિચારો તે પહેલા એક જરૂરી ચોખવટ કરી દઉ; એકબીજા વચ્ચે સાત સમંદરનું અંતર ધરાવતા આ પુસ્તકના નાયક અને નાયિકા લગભગ 39-40 વર્ષના છે અને અલગ-અલગ વ્યક્તિ સાથે પરિણિત છે. સુખી છે. રોમાન્સનો અર્થ અહી મેસેજીસની આપ-લે સુધી જ મર્યાદિત છે. ચોખવટ પુરી.

સિધ્ધાર્થ અને ગીતી (ઉર્ફે ગીતાંજલી); બાળપણથી સમજણની આરે પહોંચેલી યુવાની સુધી એકબીજાની પડોશમાં રહેતા અને એકબીજાને પસંદ કરતા બે વ્યક્તિ. જેઓ તેમના સમયના સામાજીક વાતાવરણ/સંસ્કારના કારણે એકબીજા સાથે સામાન્ય વાત કરવાની કે આંખો મેળવવાની હિંમત પણ કેળવી નહોતા શક્યા.

જ્યારે આજે તો સમય તેમને એકબીજાથી ઘણો દુર કરી ચુક્યો છે અને બંને પરસ્પર લાગણીઓ પણ ભુલાવી ચુક્યા છે. હવે ૧૯ વર્ષ બાદ ફેસબુકના માધ્યમ દ્વારા તેઓ ફરી એકવાર પરિચયમાં આવે છે અને શરૂઆત થાય છે વાતચિતની, એક જુના સમયની, ભુલાયેલા એક સંબંધની, યાદોને તાજા કરવાની.. પ્રેમ અને રોમાન્સની..

સમય, સ્થળ અને સ્થિતિ સંપુર્ણ બદલાઇ ચુક્યા છે. વર્ષો પહેલા તેમની વચ્ચે કંઇક હતું જે આજસુધી બહાર આવ્યું ન’તું, તે બધી લાગણીઓ હવે બંને અનુભવી રહ્યા છે. ઔપચારિકતા સાથે શરૂ થયેલી વાતચીત અણધાર્યા વળાંક પર આવી પહોચી છે.

પુસ્તકમાં સંવાદ અને સંપર્કનું મુખ્ય માધ્યમ, ફેસબુક, તેના હોવાનો અહેસાસ પણ કરાવ્યા રાખે છે.

મેસેજના પ્રત્યુત્તરમાં કરવામાં આવતો મેસેજ અને જે-તે સવાલ-જવાબ પાછળની માનસિક સ્થિતિ તથા પાત્રોના મનમાં ઉઠતી લાગણીઓ ઘણી ઉંડાણપુર્વક ઝીલવામાં આવી છે. જો કે આ પુસ્તક એક લેખિકા દ્વારા લખવામાં આવ્યું હોવાથી તેમાં સ્ત્રી પક્ષની લાગણીઓ વધુ સચોટ અને ઉંડાણથી આલેખવામાં આવી છે. લેખિકાએ પુસ્તકમાં ગીતીની સ્ત્રી સહજ ચિંતાઓ સાથે મેસેજની આપ-લેમાં સીડની પુરૂષ સહજ બેફિકરાઇ પણ સુંદર રીતે રજુ કરી છે.

ઘણાં જુના સમયની સામાજીક વ્યવસ્થા અને વાતાવરણની અસરમાં ખીલેલા પ્રેમનું આલેખન આજના આધુનિક સમયમાં અપ્રસ્તુત હોઇ શકે છે. નવી જનરેશન માટે તે સમયકાળને સમજવો પડશે; પરંતુ આજે ૩૦ થી વધુ ઉંમરના વ્યક્તિઓને કંઇ સમજાવવું નહી પડે!

કાચી ઉંમરમાં થયેલા પ્રથમ નિર્દોષ પ્રેમને યાદ કરાવતું આ પુસ્તક આપને જુની યાદોમાં લઇ જઇ શકે છે. એવુંયે બની શકે કે તમે કોઇ જુના પ્રેમને ફેસબુકમાં શોધવામાં ખોવાઇ જાઓ. જો તમે યુવાન હોવ અને ફેસબુક કે અન્ય કોઇ સોસિયલ સાઇટ્સમાં પ્રેમભર્યા મેસેજની આપ-લે કરી હશે તો પણ તમે દરેક મેસેજની ઉંડાઇ સમજી શક્શો. ઓકે. જેઓએ આમાંથી કંઇ અનુભવ્યું નહી હોય તેમની માટે આ એક સામાન્ય/છીછરી વાર્તા બની શકે છે અથવા તો એક સુંદર ફેન્ટસી બની શકે છે!


આ પુસ્તકને બગીચાના માળી તરફથી..

5 માંથી 3 ફુલડાં!

5 માંથી 3 ફુલડાં!