અપડેટ્સ – 181115

~ મારા તરફથી મને અને મારા બગીચાને વિતી ગયેલી દિવાળીની શુભેચ્છાઓ તથા નુત્તન વર્ષાભિનંદન! (નિર્જીવ વસ્તુ/જગ્યા સાથે આવો કોઇ શુભેચ્છા સંબંધ હું રાખું તો મને કોઇ પાગલ ગણી શકે છે. હા પણ.. અહીયાં ક્યાં કોઇ આવે છે તે મારે એટલું વિચારવું પડે!😆)

~ રજાઓમાં કચ્છની ટ્રીપ યાદગાર રહી. પરત આવીને બીજા દિવસે સાસરીયાના ગામની વાટ પકડીને ત્યાં જ વેકેશન પુરું કરવામાં આવ્યું. વ્રજ-નાયરા અને તેની મમ્મી ત્યાં રોકાઇ ગયાં છે, હું એકલો રીટર્ન આવીને ગઇકાલથી ધંધે લાગ્યો છું. (આ લગભગ દરેક વર્ષનો દિવાળી-નિત્યક્રમ છે; છોકરાંઓ નાનીના ઘરે રોકાશે, મેડમજી તેમની સાથે રહેશે અને અમે બધા પાછળ ધંધે લાગેલા રહીશું.)

~ પરત ફરતી વખતે હાઇ-વે પર જાણ્યું કે કેટલી ગાડીઓ અમદાવાદ બહાર વેકેશન કરવા ગઇ હતી! (અને આ દરેક ગાડીમાં કેટલાં વ્યક્તિઓ શહેર બહાર ગયા હશે તે વિશે અમે અંદાજ લગાવવાનો અસફળ પ્રયાસ પણ કર્યો.)

~ દર વર્ષનો અનુભવ છે કે જ્યારે આવો રજાનો માહોલ હોય અને રસ્તા પર ભારે ટ્રાન્સપોર્ટ/ટ્રક/ટ્રાવેલ્સ ઓછા હોય ત્યારે હાઇવે જાણે રેસીંગ ટ્રેક હોય તેમ પ્રાઇવેટ કાર દોડતી હોય છે. (લખનાર પોતે પણ હાઇવે પર સ્પીડના ચાહક હોવાથી આ વિશે કોઇ વિશેષ ટીપ્પણી નહી કરે. 🤐)

~ આ તો વચ્ચે દિવાળી આવી ગઇ એટલે થયું કે એક સીજનલ પોસ્ટ થઇ જાય. એમ તો ધ્યાનમાં જ છે કે શહેર-મુલાકાત અપડેટ્સની ચેઇનમાં હજુ એક પોસ્ટ બાકી છે જે ડ્રાફ્ટમાં હજુ બે દિવસ કાઢે એમ છે. (કારણમાં તો આળસ, આળસ અને માત્ર આળસ જ છે સાહેબ.)

~ આગળની પોસ્ટ ચેક કરતાં જાણ્યું કે તેમાં મૈસૂરની જગ્યાએ મસૂરી થઇ ગયું હતું. આખું શહેર બદલાઇ ગયું બોલો! હવે તો સુધારી લીધું છે. કદાચ મુળ મુળાક્ષરો સરખા હોવાથી લીમીટેડ કેપેસીટી ધરાવતા મારા મગજમાં જે તે સમયે કોઇ કેમીકલ લોચાના કારણે કન્ફ્યુઝન થયું હોઇ શકે છે. (હા તો એમ કંઇ બધે અમારી ભુલ ન હોય. #સેલ્ફ_રીસ્પેક્ટ)


મથાળું છબીઃ “સુર્યોદય” (નખત્રાણા, કચ્છ)
છબીકારઃ બગીચાનો માળી

અપડેટ્સ – 181029

~ ગત અંકથી ચાલું…

~ આગળની અપડેટ્સમાં કરેલમાં પ્લાન મુજબ એક જ દિવસ પછી બીજી વાતો ઉમેરી દઇશ એવો વિચાર મેં કેમ કર્યો હશે એ એક વિચાર માંગી લે એવો મુદ્દો છે. (કમ-સે-કમ આવા વિચારો કરતા પહેલા મારે મારી આદતો અને વ્યસ્તતાને ધ્યાનમાં લેવી જ જોઇએ.)

~ ચલો, રમેશભાઇને ગમ્યું એ થયું એમ માની ને વાત આગળ વધારું.. (કોઇ તો વિચારતું હશે કે આ રમેશભાઇ કોણ છે!!.. જુઓ, મને પણ ખબર નથી એટલે મને તો પુછવું જ નહી.)

~ હા તો અમે અટક્યા હતા બેંગ્લોરમાં અને જવું હતું Bannerghatta નેશનલ પાર્કમાં. આ પાર્કના નામનું શુધ્ધ ઉચ્ચારણ શું થાય તે વિશે ચોક્કસ ન હોવાથી તેને અંગ્રેજીમાં જ રહેવા દીધું છે. (લગભગ “બૅનરગટ્ટા નેશનલ પાર્ક” કહેવાય પણ ચોક્કસ ખબર ન હોય તે વિશે હોંશીયારી ન બતાવવી જોઇએ એવું અમારા ગુરુ શ્રી બાબા બગીચાનંદજી એ શીખવ્યું છે.)

~ છોકરાંઓની ઇચ્છાને વશ અને કંઇક નવું જોવાની આશાએ અમે નેશનલ પાર્ક તરફ નીકળ્યા. બેંગ્લોરથી વધુ દુર નથી પણ તે જ દિવસે સાંજે મૈસૂર માટે નીકળી શકાય તે વિચારે અમે સવારે થોડા વહેલા નીકળ્યા. સ્થળ પર સમયસર પહોંચી ગયા અને સૌથી પહેલું કામ સફારીમાં એન્ટ્રી લેવાનું કર્યું.

~ બાળકો સાથે મોટાને પણ ગમે તેવું સ્થળ છે. શાયદ ગુજરાતમાં આવી જગ્યા કોઇ નથી જ્યાં દરેક પ્રકારના પ્રાણીઓને જંગલમાં જોઇ શકાય. ખુંખાર વન્ય જીવો ને આટલા નજીકથી આઝાદ ફરતાં પહેલી વાર દેખ્યા. વ્રજ માટે પણ આવો પ્રથમ અનુભવ હતો એટલે તેને પણ મજા આવી. (પહેલા આવા પ્રાણીઓને માત્ર પીંજરામાં પુરાયેલા દેખ્યા છે.)

~ આ નેશનલ પાર્ક વિશાળ જગ્યામાં પથરાયેલો છે અને તેમાં ફરવા માટે બસની સુંદર વ્યવસ્થા છે જેથી વન્ય પ્રાણીઓને ખલેલ કર્યા વગર અમે સામાજીક પ્રાણી બંધ બસમાં ફરી શકીયે. ત્યાં બટરફ્લાય પાર્ક પણ ઠીક-ઠીક છે અને ઘણું વિશાળ પ્રાણી સંગ્રહાલય પણ છે! (જે જોવામાં અમે થાકી ગયા અને અધુરું મુકીને પરત થયા.)

~ ઘણાં ફોટો ક્લિક કર્યા છે પણ આજે સમય હશે એટલા ઉમેરીશ. બીજા પછી કયારેક અલગ અપડેટ્સમાં દેખાશે.

~ આજ માટે આટલું ઠીક લાગે છે. હવે પછીના અપડેટ્સમાં મૈસૂરની વાતોને ફોટો સાથે નોંધવામાં આવશે. (આ વખતે સમય નક્કી નથી કરવો. પોતાની નજરમાં ખોટા પડવાની પણ હદ હોય યાર..)

~ વધુ આવતા અંકે..

#સાઇડટ્રેકઃ આ બગીચા થકી જેમના પરિચયમાં છીએ તેવા શ્રી ચંદ્રકાંતભાઇ સાથે ફોન પર મુલાકાત કરીને સંતોષ માન્યો. તેમના શહેરમાં હોવા છતાં રૂબરુ મળવા જઇ શકાય એટલો સમય મારી પાસે નહોતો અને વળી અમે કોઇ એક જગ્યાએ અટકતા ન હોવાથી તેમને કોઇ ચોક્કસ જગ્યાએ મળવા બોલાવી શકાય તેવી પરિસ્થિતિ નહોતી. આશા છે કે ક્યારેક અમદાવાદમાં જ મુલાકાત થશે.

અપડેટ્સ – 181028

. . .

~ આટલા જ દિવસોમાં મારા બગીચામાં બીજીવાર આવવું એ જ એક અનોખી વાત છે મારી માટે! સૉ, થ્રી ચિયર્સ ટુ મી! (હીપ હીપ હુર્રે..)

~ છેલ્લી અપડેટ્સ નોંધતી વખતે માઉન્ટ આબુની ટ્રીપ વિશે લખ્યું હતું પણ બે દિવસ પછી મનમાં એક વિચાર આવ્યો કે હું કંઇક ભુલી ગયો છું. (એમ તો હું આખા ગામના કામ અને ક્યારેક તો મને પણ ભુલી જઉ છું તોય બોલો હું આવું લખીને આજે નવાઇ કરું છું!)

~ હા તો મેં મારી જ જુની અપડેટ્સ ચેક કરીને જાણ્યું કે જ્યાં વારંવાર રખડવા જઇએ તેની નોંધ તો લીધી પણ આ વર્ષમાં થયેલ બેંગ્લોર અને મૈસૂર શહેરની પ્રથમ મુલાકાત જ ભુલાઇ ગઇ છે. (આવુ છે મગજ મારું.. શું યાદ રાખે અને શું ભુલાવી દે.. કંઇ કહેવાય નહી!)

~ વિસ્તારથી લખવાનો વિચાર હતો પણ વિસ્તાર કરવા રહીશ તો આખા વિચારનું વતેસર થઇ જશે એટલે આજે જેટલી નોંધ થાય એટલી કરું, પછી તો જેવી રમેશભાઇની મરજી. (વાતનું વતેસર થતું બધાએ જોયું હશે પણ “વિચારોનું વતેસર” એ અમારી અનોખી શોધ છે! ભાષામાં આ નવા યોગદાન બદલ કોઇ ચાહક મને બિરદાવવા માગે તો હું રોકડ સાથે સ્વીકારી લઇશ.)

~ સમય હતો એપ્રિલ મહીનાનો. અમદાવાદથી ઉડીને સીધા બેંગ્લોર પહોંચ્યા હતા એટલે મુસાફરીની મજા કે સજા જેવું કંઇ ખાસ ન અનુભવાયું. (મારા મતે પ્લેન સમય બચાવે પણ મુસાફરીની અસલી મજા ટ્રેનમાં આવે. ક્યાંક દુર પહોંચ્યા એવુંયે લાગે!)

~ મુસાફરી દરમ્યાન નાયરાને તો દરેક વિમાન પરિચારિકાએ (બોલે તો.. એર હોસ્ટેસ) આખા પ્લેનમાં એક પછી એક ફેરવી હશે. ફોટો પણ ઘણાં ક્લિક કરાવ્યા છે. ઉપર હેડરમાં પણ તેવો જ એક ફોટો છે. (નાયરાને તેની સાથે જોઇને કોઇને ગેરસમજ ન થાય એટલે આ ચોખવટ કરી છે.)

~ બેંગ્લોર જવાનું કારણ આમ તો પારિવારીક હતું પણ આટલે દુર ગયા હોઇએ તો બે જગ્યા જોઇ લઇએ એમ વિચારીને આસપાસ ફરવાનું પણ ગોઠવ્યું હતું. બેંગ્લોરમાં ટ્રાફિક ખરેખર વધારે છે પણ વ્યવસ્થા અને ડ્રાઇવિંગ સેન્સ સારી લાગી મને. (દરેક અમદાવાદીએ નોંધવા જેવું છે કે આપડી ટ્રાફિક સેન્સ ખરેખર ભયાનક છે.)

~ સાંભળ્યું હતું એટલું સુંદર વાતાવરણ ન લાગ્યું પણ સવાર-સાંજની ઠંડક બહુજ મસ્ત લાગી. વાતાવરણમાં થતા ફેરફારની અસરના કારણે ગરમી હવે વધી છે એવું સ્થાનિકનું કહેવું છે. આસપાસના લોકો મળતાવડા ઓછા લાગ્યા. (મારો અનુભવ કે અનુમાન ખોટા પણ હોઇ શકે છે.)

~ બેંગ્લોરમાં આમ-થી-તેમ થોડું રખડ્યા અને એક-બે મુખ્ય સ્થળ દેખ્યા. ત્યાં ફરવા માટે અમારી પાસે સમય માત્ર એક દિવસનો હતો અને વળી રસાકસીવાળી ચુટણીના ચક્કર ચાલુ હતા એટલે વધારે ફરવા જેવું ન હતું. (અમદાવાથી નીકળતી વખતે જે પ્લાન બન્યા હતા એ તો હવામાં જ છુ થઇ ગયા હતા.)

~ સીટીની ટ્રાફિક, ઇલેક્શન ટાઇમ અને વડીલોના મંતવ્યના આધારે મૈસૂર જવાનો પ્લાન બનાવવામાં આવ્યો પણ ચિલ્લર પાર્ટીની એક્સ્ટ્રા ડિમાન્ડના લીધે સૌથી પહેલા Bannerghatta National Parkની મુલાકાત લેવાનું નક્કી થયું. (સમય-સમય બલવાન હૈ ભૈયા..)

~ જે રીતે હું અત્યારે લખી રહ્યો છું તે રીતે લખતો રહીશ તો આ પોસ્ટ ઘણી લાંબી થશે એમ જણાય છે. પણ અત્યારે પુરતો સમય નથી અને ઉમેરવા માટે બીજી વાતો પણ છે એટલે હવે બીજી વાતોને આવતીકાલે ચોક્કસ ઉમેરવાના વિચાર પર મુકવી ઠીક લાગે છે. (મારી ઇચ્છા છે કે આવતીકાલે જ હું ઉમેરી શકું.)

#સાઇડટ્રેક – આ શહેરોના નવા નામ બેંગ્લુરુ અને મય્સુરુ સ્વીકારવામાં મારા વિચિત્ર મનને મનાવવું પડશે. ત્યાં સુધી જુના નામથી ચલાવી લેવું એવી વિનંતી. (અથવા ચોખ્ખી ધમકી.)