સપ્ટેમ્બર 12, 2017 બગીચાનો માળી

~ નામ પાડવા એ અમારો જન્મસિદ્ધ હક છે અને એ જ કહથી અમે અમને ગમતી વ્યક્તિઓને નામથી વધુ ઉપનામથી ઓળખવું પસંદ કરીએ છીએ. (આ નામ પ્રથમ વખત અહીં નોંધવામાં આવી રહ્યું છે એટલે જણાવી દઉ કે આજે મારી ઢીંગલીની વાત છે.)

~ ટીનટીનના ફોટો વખતે વિચાર હતો કે અલગથી નાયરાના ફોટોની પોસ્ટ પણ બનાવવામાં આવે.. (એમ તો હું ઘણાં વિચાર કરતો જ રહો છું.)

~ બસ તો આજે એ જ..


*બગલી = બગલાનું (Stork) સ્ત્રીલિંગ…

સપ્ટેમ્બર 6, 2017 બગીચાનો માળી 2Comment

~ નિયમિત શાંત જીંદગીને છંછેડીને અસ્તવ્યસ્ત કરવામાં થોડી અવ્યવસ્થા સર્જાશે એ અંદાજ હતો બસ એ જ અવ્યવસ્થા વચ્ચે આજે અપડેટ્સની નોંધ થઇ રહી છે. (આ સમયની દરેક વાતની નોંધ કરવાની ઇચ્છા છે.)

~ આસપાસમાં સવાલ ઉભા થઇ રહ્યા છે કે બદલવું જ હતું તો થોડું જ બદલાય ને… આટલું બધુ શા માટે??? –સાચું કહું તો મને પણ ખબર નથી કે મેં કેમ આ બધું સ્વીકારી લીધું છે. (કોઇ-કોઇ નિર્ણય માટે આપણી પાસે ચોક્કસ બહાનાઓ પણ બચતા નથી.)

~ સમજદાર લોકો તો કહે છે કે એકલા હાથે આટલું જોખમ ન લેવાય અને મારી અક્ક્લ પણ લોકો સાથે સહમત થાય છે; પણ મારું દિલ કહે છે કે બધુ ઠીક થઇ જશે. મને ગમે છે અને હું તૈયાર છું. હું કરી શકીશ એટલો વિશ્વાસ છે. (અબ તો સબ દિલ કે ભરોસે પે હૈ..)

~ ઘણીબધી માથાકુટ વચ્ચે પણ હું શાંત કેમ છું એ મનેય સમજાતુ નથી. હું અત્યારે પણ એટલો જ રીલેક્સ રહી શકું છું જે હું હંમેશા હતો. માથા પર ઉચકેલો બોજ મને કેમ જણાતો નથી એ તો રમેશભાઇ ને પુછવું પડે! (યાર, મારા આ દિમાગમાં ચોક્કસ કોઇ કેમીકલ લોચો છે. મને ભાર જ નથી લાગતો કોઇ વસ્તુનો એવું કેમ બની શકે..)

~ બેફિકરાઇ મારા સ્વભાવમાં કાયમી ઘર બનાવી ચુકી છે. પણ બદલાવ પછીનું જે ભવિષ્ય મેં સ્વીકાર્યું છે તેમાં બેફિકરાઇના આ કાયમી સ્ટેટસમાં ચેન્જ કરવો જરૂરી હશે. (પતા નહી ખુદ કે સાથ મેં ક્યા-ક્યા કરનેવાલા હું..)

~ લગભગ બે મહિનાનો સમયગાળો છે જ્યારે હું આ અવસ્થામાંથી પસાર થવાનો છું. તેમાં મારી માટે એક અલગ દુનિયા તૈયાર થઇ રહી છે. દુરથી જ એટલી અતિવ્યસ્તતા જણાઇ રહી છે કે શાયદ હું મારા આ બગીચા સુધી પણ નિયમિત ન પહોંચી શકું. (જો હું ઘણાં દિવસો સુધી ગાયબ રહું તો અહી આવતા વાચકોને વિનંતી છે કે મને ખેંચી ને બોલાવજો. પુણ્યનું કામ થશે ભાઇ…)

~ હા, એમ તો હું નિયમિત આજેય નથી. આશા રાખું છું કે અહી મહિનાઓમાં થતી પોસ્ટમાં વર્ષોનું અંતર ન આવી જાય. વધુ આવતા અંકે…

# સાઇડટ્રેકઃ

એક મેસેજઃ તમે તમારી જ વાતો સિવાય નવું લખતા જ નથી. બીજું કંઇક લખો તો અમને વાંચવાની મજા આવે.
ઓપન રીપ્લાય – દોસ્ત, આ મારો બગીચો છે. મારા સિવાય બીજા કોઇની મજા માટે લખતો પણ નથી અને મારી મજા આ જ બધી વાતોમાં છે.

જૂન 13, 2017 બગીચાનો માળી

~ ઘણાં સમય પછી અપડેટ્સની નોંધ થશે એવું જણાય છે. (પોસ્ટ ન ઉમેરી હોય તો એવું જણાય ને!.. એમાં કોઇ નવાઇ નથી.)

~ નવા ઉગેલા ફુલના ચક્કરમાં બગીચાનો માળી તેના આખા બગીચાનું કાયમી કામ ભુલી ગયો હોય એવી સ્થિતિ છે. (એક રીતે જોઇએ તો એ નવા ફુલની વાતો પણ મારા બગીચાની અપડેટ્સ જ છે ને..)

~ ઓકે તો લેટેસ્ટ અપડેટ્સમાં તો એવું છે કે વ્રજ, નાયરા અને મેડમજી વેકેશન પુરું કરીને ઘરે આવી ગયા છે અને ગઇ કાલથી વ્રજની સ્કુલ શરૂ પણ થઇ ચુકી છે. મને એમ હતું કે વ્રજ આટલા લાંબા વેકેશન પછી ફરી સ્કુલ જવામાં એક-બે દિવસ આનાકાની કરશે પણ તે આ બાબતે જરાયે મારા જેવો નથી. (બોલો, ખુશી થી સ્કુલ જવા તૈયાર થઇ ગયો મારો દિકરો! ગુડ બૉય.)

~ બગીચાના ફુલો ફરી ફુલદાનીમાં ગોઠવાઇ જશે. -વાળી વાત અત્યાર સુધી 750 લોકો પોસ્ટ કરી ચુક્યા છે અને આ વૉટ્સએપ ફોરવર્ડીયાઓના તો મોબાઇલ છીનવી લેવા જેવા છે! 😀 આવી પોસ્ટ લખનાર/ફોરવર્ડ કરનાર ભાઇ(કે બહેન)ને એમ હશે કે તે પહેલી વાર કહી રહ્યા છે! પણ તેમની આવી ધારણા સિવાય બીજું કંઇ જ નવું નથી હોતું… (તે માસુમ ઇન્સાન જે ભલું-બુરું જણાવવા ઇચ્છતા હોય છે તે બધું જ આ સંસારમાં અગાઉ કહેવાઇ ચુક્યું હોય છે.)

~ આજકાલ સમગ્ર ગુજરાતની સ્કુલોમાં ફી વિશે જબરી અસમંજસતા ચાલી રહી છે. અન્ય વાલી’ઓ મને તેમની લડતમાં જોડાવવા અને સરકારી નિયમોના આધારે વધારે ફી ની વિરુધ્ધમાં લડવા આગ્રહ કર્યો છે પણ ખબર નહી કેમ મને આ લડતમાં તર્ક નથી દેખાતો. શિક્ષણનો ખર્ચ હવે ખરેખર ઘણો વધી ગયો છે તે આપણે સૌ જાણીયે છીએ અને તેની પર સરકારી અંકુશ હોય તો ઉત્તમ છે; પણ દરેક સ્કુલ માટે એક જ નિયમે ફી નક્કી ન કરી શકાય તે સ્વીકારવું પડશે. (અત્યારે તો મામલો હાઇકોર્ટમાં છે પણ મને લાગે છે કે છેલ્લે આમાં ભીનું સંકેલાઇ જશે. રાજકારણીઓની જ ઘણી સ્કુલો છે એટલે ચુટણી સુધી કેસ ખેંચાશે અને પછી જૈસે થે!)

~ વ્રજની સ્કુલમાં તો દરેક સ્ટુડન્ટના એડવાન્સ ચેક લઇ લીધા છે અને એક ચેક તો ક્લીઅર પણ થઇ ગયો છે. બીજા ચેક તેઓ ગવર્નમેન્ટ પોલીસી નક્કી કર્યા બાદ જ તેમના એકાઉન્ટમાં ભરશે એવું સ્કુલના વ્યવસ્થાપકોનું કહેવું છે. (જો કે કેટલાક અવિશ્વાસુ વાલીઓએ સ્ટૉપ પેમેન્ટનો વિકલ્પ પસંદ કરેલો છે.)

~ ધંધાની એક નવી જગ્યાને સજાવવામાં હમણાં વ્યસ્ત છું અને નિયમિતતા ને છંછેડીને થોડો અસ્તવ્યસ્ત પણ છું. જોઇએ કે આ નવી અસ્તવ્યસ્તતા મને ક્યાં સુધી લઇ જાય છે. દિમાગને હમણાં ફુલ્લી દિલથી ચલાવું છું. (મરકટ મનનું કંઇ નક્કી ન કહેવાય. કભી ઇસ ઔર તો કભી ઉસ ઔર..)

~ દેશ-દુનિયાની વધારાની ચિંતાને મનમાંથી કાઢવા માટે રાત્રે એક જ વાર ન્યુઝ ચેનલમાં હેડલાઇન્સ સિવાય વધુ ન્યુઝ ન દેખવાનો નિયમ ઉત્તમ સાબિત થઇ રહ્યો છે. આજકાલની અપડેટ્સમાં રાજકારણ વિશે ઘણી ઓછી વાતો નોંધ થતી હોવાનું મુખ્ય કારણ આ નિયમ છે. (હા પણ પેલા એન.ડી.ટી.વી. ના પ્રણવ રૉય સાથે જે થયું તે હજુ ઘણું ઓછું છે. યે દિલ માંગે મોર..)

~ વરસાદ આવવાની તૈયારી જણાય છે હવે. અત્યાર સુધી એક વાર મસ્ત કરાં અને બે વાર હળવા ઝાપટાં આવ્યા છે. લેકીન મેઇન સિઝન અભી બાકી હૈ મેરે દોસ્ત.. (આપણી ફેવરીટ સિઝન હોં કે! 🙂 )

# નોંધ લાયક: કાલે જ કોઇ સાથે ચર્ચા કરતાં યાદ આવ્યું કે હું લગભગ 3.5 વર્ષથી બિમાર નથી થયો! (ટચ વુડ!.. 😉 )