બગ્ગુ’નો ત્રીજો જન્મદિવસ

Nayra's third birthday
Happy Birthday Nayra ❤

16 એપ્રિલના દિવસે નાયરા ત્રણ વર્ષની થઈ. આ દિવસો ફટાફટ નીકળી ગયા હોય એમ લાગે તે મારા માટે હવે કોઈ નવી વાત નથી. સમયને પકડવામાં હું જ ધીમો હોઉ તો તેમાં સમયની ઝડપનો વાંક કાઢવો ઠીક નથી. (અબ જો સહી હૈ, તો હૈ)

સ્વાભાવિક છે કે આ દિવસ માટે અમે આનંદિત હોઈએ અને વિદેશી પદ્ધતિથી ઉજવણી કરવા આતુર બનીએ; પરંતુ કોરોના રોગચાળાથી ઉદ્દભવેલ વિચિત્ર પરિસ્થિતિ સામે લાચાર બનીને અમે પરિવારના સાડા-ચાર સભ્યોએ ટુંકમાં સંતોષ માની લીધો. (બીજો કોઇ વિકલ્પ પણ ન’તો.)

લોકડાઉન હોવાથી બહારથી કેક પણ મળી શકે એમ ન હોય ત્યારે મર્યાદિત સ્ત્રોત અને સાધનોનો ઉપયોગ કરીને ઘરે જ બધી વ્યવસ્થા કરવામાં આવી. મેડમજીએ ઘરે કેક બનાવી અને તે પ્રક્રિયામાં સહયોગ કરવાનો મેં પણ આનંદ લીધો. તે મીઠા પદાર્થની છબી અહી યાદગીરી તરીકે જોડવામાં આવી છે. (કોઇ દેખાડો સમજે, તો એ પણ ખોટું નથી. 😋)

બગ્ગુના જન્મદિવસની કેક

એમ તો આ કેક’ને સજાવવાનો સંપૂર્ણ શ્રેય હું પોતાને આપીશ. આ ક્ષેત્રે કોઈ જ અનુભવ ન હોવા છતાં માત્ર બે-ત્રણ વસ્તુઓથી બધાને ગમે એવી સજાવટ કરવામાં હું સફળ થયો તે જાણીને મને પોતે નવાઇ લાગી. પોતાની કળા પર થોડુક અભિમાન પણ થઈ આવ્યું. (પોતાની કળા પર અભિમાન તો હોવું જ જોઇએ. 😎)

પ્રથા અનુસાર હેપ્પી બડ્ડે નાયરા ગીત ગાઇને અને કેક-કટીંગ વિધી પુરી કરીને જન્મદિવસની ઔપચારિકતા પુરી કરવામાં આવી. ત્યારબાદ એકબીજાને કેક ખવડાવીને મોઢું મીઠું કર્યું અને મેં ઢગલો ફોટોને કેમેરામાં કંડારીને સમયને ચિત્રમાં હંમેશા માટે સ્થિર કરવાનો પ્રયત્ન કર્યો. (સમય ક્યારેય અટકતો નથી, છતાંયે આપણે પ્રયત્ન છોડતા નથી હોતા.)

જન્મદિવસની કેક સાથે નાયરા..

Nayra's birthday

કેક ઉપર ઉંમર દર્શાવતો નંબર 3 લખવો હતો પણ તે માટે બીજો ઉપાય ન સુઝયો એટલે મીણબત્તીનો ઉપયોગ કરીને મન મનાવ્યું; એમ પણ મમ્મીના આગ્રહથી મીણબત્તી સળગાવવા-બુઝાવવાની પ્રથા રદ કરી હતી. (રદ કરવાના કારણમાં વોટ્સએપ યુનિવર્સીટીનું જ્ઞાન જવાબદાર ગણી શકાય.)

આ ઉપરાંત આ દિવસની યાદગીરી તરીકે નાયરા સાથે અમે બધાએ બીજા ઘણાં ફોટો પણ ક્લીક કર્યા છે, જેને ગુપ્તતાના નિયમ અનુસાર અહી રજુ કરવામાં નહી આવે. #ક્ષમા

પણ બગ્ગુ પર એવો કોઇ નિયમ લાગુ થતો નથી, એટલે આ દિવસના સંભારણારુપ એવા બીજા બે ફોટો અહી ચોંટાડવાની મારી ઇચ્છા થાય છે. (અને મારી આ ઇચ્છા હું હમણાં જ પુરી કરુ છું! 😉)

Nayra Photo in brown dress
Nayra Photo

આ વખતે પહેલીવાર જન્મદિવસે મારા વોટ્સએપ અને ફેસબુક-ઇન્સ્ટાગ્રામની પર્સનલ પ્રોફાઇલના સ્ટેટસમાં તે વિશે અપડેટ મુકવામાં આવી. (પ્રોજેક્ટઃ Being Social)

પરિવારજનો, મિત્રો અને બિઝનેસ-કોન્ટેક્ટ્સમાંથી અલગ-અલગ લોકોના ત્યાં બધે એટલા બધા મેસેજ આવ્યા કે બધાને પર્સનલી પ્રતિભાવ આપવો અઘરું કામ લાગ્યું એટલે ઉપરોક્ત દરેક જગ્યાએ સાંજે ફરી એક આભાર-સ્ટેટસ બનાવીને મુકવામાં આવ્યું. (અને તેની પર વળી અલગથી પ્રતિભાવ મળ્યા!)

અહીં તે આભાર-સ્ટેટસની ઇમેજને પણ ખાસ જોડવામાં આવે છે કેમ કે તેમાં નાયરાનો એક બહુજ મસ્ત ફોટો છે. વળી, અહીં મારા આનંદના ભાગીદાર બનનાર સૌનો આભાર માનવાનો મારો ઇરાદો પણ છે. 🙏

cute smile and thank you

બંધનના આ દિવસને પણ અમે યાદગાર બનાવીને ખુશ થયા. ઉજવણીના આ દિવસે ઉપરની દરેક છબી કંડારનાર તથા તેમાં જરુરી કારીગરી ઉમેરનાર સજ્જનનો પણ ખુબ-ખુબ આભાર માનવો જોઇએ. (હા, અહીયાં મારી જ વાત થાય છે!)

😊

મુલાકાતઃ સાબરમતી આશ્રમ

સાબરમતી આશ્રમ કે ગાંધી આશ્રમ, અમદાવાદ. Sabarmati Ashram, Gandhi Ashram Ahmedabad

~ પોરબંદરના મોહનદાસ કરમચંદ ગાંધી જે સમયજતાં ગાંધીજી અને બાપુ તરીકે આખા ભારતમાં ઓળખાયા. તેમની મહાત્મા બનવા તરફની યાત્રાની શરુઆત જ્યાંથી થઇ તે જગ્યા એટલે આ સાબરમતી આશ્રમ.

સાબરમતી આશ્રમ કે ગાંધી આશ્રમ, અમદાવાદ. Sabarmati Ashram, Gandhi Ashram Ahmedabad

~ એક સમયગાળા દરમ્યાન ગાંધીજીનું રહેઠાણ રહેલ આ જગ્યા હવે ઐતિહાસિક સ્થળ છે; જેની મુલાકાતે વિશ્વભરથી પ્રવાસીઓ આવતા હોય છે… પણ અમદાવાદમાં કાયમી વસતા હોવા છતાં મેં 15 વર્ષ બાદ સાબરમતી આશ્રમની મુલાકાત લીધી! (જેની પાસે હોય તેને તેની કદર ન હોય તે માનવ સ્વભાવમાં છે.)

~ આશ્રમ રોડ પર મહિનામાં 15 વાર જવાનું થતું હશે તો પણ કેમજાણે મનથી ઇચ્છા હોવા છતાંયે આ સ્થળે અટકવાના સંજોગ બનતા ન હતા. છેવટે એક બહાને દિવસ નક્કી થયો અને મુલાકાતનો પ્લાન બની ગયો. (ઘણીવાર મને ધક્કો મારનાર અથવા તો ખેંચી જનાર વ્યક્તિ કે કારણ ખુટતું હોય છે.)

~ અહીયાં 15-મી ઓગષ્ટના દિવસે આવવાનો પ્લાન હતો એટલે પહેલાંથી માનસિક રીતે તૈયાર હતો કે સ્વાતંત્ર્ય દિવસ હોય અને ગાંધી આશ્રમ જેવી જગ્યા હોય તો હાઇ-સિક્યુરીટી હોવી સ્વાભાવિક છે. એમપણ આવા દિવસોમાં રિસ્ક સામાન્ય દિવસો કરતાં વધુ રહે છે.

~ પહોંચતા પહેલાં વિચારીને રાખ્યું હતું કે ચારે તરફ કડક સુરક્ષા હશે એટલે કેમેરાને અંદર લઇ જવાની પરવાનગી પણ ન મળે, મોબાઇલને કદાચ ગાડીમાં જ રાખવો પડશે અને દરેક ખુણે તમારી ઉપર નજર રાખવા માટે કમાન્ડોઝ હાજર હશે; પણ અહીયાં તો સાવ અલગ અહેસાસ થયો. મુખ્ય એન્ટ્રીમાં એક-બે સામાન્ય પોલીસવાળા સિવાય કોઇ જગ્યાએ એવું કંઇજ ન જણાયું અને જે-જે વિચાર્યું હતું એવું તો કંઇ જ ન થયું!

~ અહીયાં બધી જગ્યાએ કોઇજ પ્રકારની રોકટોક વગર મનફાવે ત્યાં ફરી શકાય છે અને ઐતિહાસિક ઇમારતો તથા બીજા મુલાકાતીઓને ખલેલ ન થાય એમ જ્યાં ફાવે ત્યાંથી, જેવા ફાવે તેવા ફોટો ક્લીક કરી શકો છો! (આ મને વધારે ગમ્યું.)

~ કોઇપણ પ્રકારનો એન્ટ્રી ચાર્જ નથી અને અંદર કોઇ ફેરીયા/ભીખારીઓ કે ગાઇડનો ત્રાસ નથી એ પણ ગમ્યું. જો કોઇ વિષયે માહિતી કે ઐતિહાસિક જાણકારી ઇચ્છો તો આશ્રમના વ્યવસ્થાપકો વિસ્તારથી જણાવવા તત્પર છે. (બસ, એકવાર તેમને પુછવું પડે!)

~ ખરેખર શાંત અને રમણીય જગ્યા છે. આજે આ જગ્યાની સ્વચ્છતા અને સુંદરતા જાળવવા બદલ વ્યવસ્થાપકોને શાબાશી આપવી પડે! ગાંધીજી પોતે સ્વચ્છતાના આગ્રહી હતા અને તેમના આશ્રમમાં આજે પણ તેનું ધ્યાન રખાય છે તે સારું લાગ્યું.

~ અમારી પણ અંગત માન્યતાઓ અને કેટલીક વિચિત્રતાઓ છે કે જે આ મહાન વ્યક્તિત્વના દરેક વિચારો સાથે બંધબેસતી નથી. પરંતુ દેશની આઝાદી સમયના એક વિશિષ્ટ અને સમગ્ર દુનિયામાં સન્માનિત વ્યક્તિની ખાસ જગ્યા વિશેની આ મુલાકાત પોસ્ટમાં તે બધું ઉમેરવું યોગ્ય નથી લાગતું. (ક્યારેક અંદરની નકારાત્મકતાને કંટ્રોલ કરવી જરુરી હોય છે.)

# હવે છે સ્થળની મુલાકાત દરમ્યાન કરવામાં આવેલ ક્લીક્સઃ

નકશો - સાબરમતી આશ્રમ કે ગાંધી આશ્રમ, અમદાવાદ. Sabarmati Ashram, Gandhi Ashram Ahmedabad Map

# સ્થળ અને દિશા સુચક પાટીયાંઓ.. (આ ફોટો એટલાં માટે છે કે અહીયાં શું-શું આવેલું છે તે સમજી શકાય.)

આશ્રમમાં ગાંધીજી જે ઘરમાં રહેતાં તે ઘરના ફોટો..

*કોઇપણ ફોટો પર ક્લીક કરીને તેને પુરા કદમાં જોઇ શકાશે.

સાબરમતી આશ્રમ કે ગાંધી આશ્રમ, અમદાવાદ. Sabarmati Ashram, Gandhi Ashram Ahmedabad

# આશ્રમના પરિસરમાં બનાવવામાં આવેલ સુંદર મ્યુઝીયમ..

~ આ સંગ્રહાલયમાં મોહનદાસથી મહાત્મા બનવા સુધીની સફરની ફોટોગ્રાફ સાથે વિસ્તૃતમાં માહિતી છે અને એ પણ વાંચવી-જોવી ગમે તે રીતે સુંદર આયોજનથી ગોઠવાયેલી! જેના કેટલાક ફોટોગ્રાફ અહી નીચે જોઇ શકો છો..

સાબરમતી આશ્રમ કે ગાંધી આશ્રમ, અમદાવાદ. Sabarmati Ashram, Gandhi Ashram Ahmedabad
સાબરમતી આશ્રમ કે ગાંધી આશ્રમ, અમદાવાદ. Sabarmati Ashram, Gandhi Ashram Ahmedabad