જૂન 19, 2014 બગીચાનો માળી 0Comment

– જે રીતે અહી સમયસર લખતા રહેવાનું ટાળવામાં આવી રહ્યું છે તે જોતાં એવું લાગી રહ્યું છે કે મારું મન એક જગ્યાએ ચોંટવાને બદલે વિના કારણે આમ-તેમ ભટકી રહ્યું છે. (આ મરકટ મનનું તો કામ જ છે ભટકવાનું અને વળી એ નહી ભટકે તો બીજું કોણ ભટકશે?)

– અસહ્ય ગરમીના સમાચારો ઉમેરવા માટે સમય ન ફાળવી શકાયો અને હવે તો વરસાદના અપડેટ્સનો સમય આવી ગયો છે. જો કે બે-ત્રણ દિવસ પહેલા બનેલા મસ્ત વાતાવરણ વચ્ચે આવેલો વરસાદ હવે અચ્છે દિનના સપના બતાવીને છેતરી ગયો હોય એવું લાગે છે અને પ્રજા બિચારી બફારાની ગરમી સહન કરવા મજબુર છે. (પણ દક્ષિણ ગુજરાતમાં ભારે વરસાદના સમાચારો ન્યુઝમાં દેખાઇ રહ્યા છે.)

– મારી અનિયમિતતાની જેમ વ્રજની ધમાલ પણ દિન-પ્રતિદિન વધી રહી છે. છોકરો હવે જીદ્દી પણ થતો જાય છે! અને આ સાહેબ તો તેની ઉંમર કરતાં વધુ એક્ટિવ થતા જાય છે!  (ઘરમાં પ્રથમ બાળક હોય એટલે તેની પરવરિશ-વ્હાલ અને માંગ્યા પહેલા મળે એ સ્થિતિ જ બાળકને જીદ્દી બનાવી દે છે એવું અમારું માનવું છે.)

– વ્રજના ફોટોની છેલ્લી પોસ્ટને પણ સમય થઇ ગયો છે એટલે નવા ફોટો થોડા દિવસમાં જ અહી રજુ કરવાનો વિચાર છે. આ ફોટો-પોસ્ટ પહેલા કદાચ સાબરમતી-રિવરફ્રન્ટના ફોટો’ઝ ની એક પોસ્ટ આવવાની સંભાવના પણ છે! (નોંધ: સંભાવનાઓ ઉપર વધુ ધ્યાન ન આપવું.)

– થોડા દિવસ પહેલા ATM5 (5th Ahmedabad Tweet Meetup) માં ભાગ લેવામાં આવ્યો હતો. આવી રીતે એકઠા થતા અજાણ્યા લોકોમાં મારી જાતનો ઉમેરો કરવાનો આ પ્રથમ પ્રયત્ન હતો. સૌની વચ્ચે ઉપસ્થિત રહીને પણ નક્કી કર્યા મુજબ દુરી જાળવી રાખવામાં આવી, પણ અલગ-અલગ જગ્યાએથી પધારેલ મિત્રોના અનુભવો અને પરિચય નજીકથી જાણ્યા. એકંદરે આનંદિત અનુભવ રહ્યો અને ફરી વખત આવું કોઇ આયોજન થાય તો તેમાં ભાગ લેવો -એવો વિચાર બનાવવામાં આવ્યો. (આ મેળાવડા વિશે વધું જાણવું હોય તો ટ્વીટરમાં અથવા #ATM5 સર્ચ કરીને જાણી શકાશે.)

– ચુટણીઓનો ફિવર ઉર્ફે બુખાર ઉર્ફે તાવ હજુ ઉતર્યો નહોતો’ને વળી એક ચુટણી આવી ગઇ છે. ના ભ’ઇ, હમણાં કોઇ સરકારી ચુટણી નથી, આ તો એક કો-ઓપરેટીવ સંસ્થાની ચુટણીની વાત થાય છે. આમ તો ‘નખરાં-ને-નિયમો’ વિધાનસભા ચુટણી જેવા છે! અને વધુ નવાઇની વાત એ છે કે આ વખતે અમે પણ એક પક્ષ તરફથી ચુટણી-કાર્યાલયની નાનકડી જવાબદારી નિભાવી રહ્યા છીએ. (જોયું! શોખ હંમેશા આકર્ષતો હોય છે અને વ્યક્તિ અનાયાસે જ તેની તરફ ખેંચાઇ જતો હોય છે!)

– અત્યારે અમારું મુખ્ય કામ આખા ગુજરાતમાં વિખરાયેલા મતને એકઠા કરવાનું છે અને ત્યારબાદ મતદાર-ને-રીજવીને-વધુ-વોટ-મેળવો-યોજના અમલમાં મુકવાની છે! વિવિધ જ્ઞાતિ-વ્યવસાયના વિખરાયેલા મતદારોને મતદાન બુથ સુધી ખેંચી લાવવા માટે માઇક્રો-પ્લાનીંગ પણ કરવામાં આવી રહ્યું છે. (ચુટણીની પ્રક્રિયામાં સીધા જ જોડાવાનો આ મારો પ્રથમ અનુભવ હશે.)

– ધંધાના કામને હમણાં ટાળવામાં આવી રહ્યા છે અને આમ પણ માર્કેટમાં મંદીનો માહોલ છે એટલે વધારે કામ પણ નથી. (હમારે અચ્છે દિન કબ આયેંગે, મોદીજી?)

– આવનારા બજેટમાં ઇન્કમટેક્ષમાં ૫ લાખ સુધીની છુટની વાતો સંભળાઇ રહી છે પણ મને તેમાં સચ્ચાઇ હોય એવું લાગતું નથી. જો કે આઇડીયા ઉત્તમ છે પણ જો આ છુટ અચાનક અમલમાં આવે તો નાણાંકીય ક્ષેત્રે ઘણી વિચિત્રતા સર્જાઇ શકે છે. મારા મતે આટલી છુટ આપવી જ હોય તો તેને એક-બે સ્ટેપમાં લાગુ કરવી ઠીક રહેશે. (નાણાંપ્રધાન સાંભળો છો ને?)

– બીજા કોઇ મારું સાંભળે કે ન સાંભળે પણ અહી આવનારા બે-ચાર લોકો તો છે જ, જે મારી ગમે તેવી (અને ન ગમે તેવી) વાતોને સુખે-દુઃખે સાંભળી* લેતા હોય છે. (*અહી વાંચનના અર્થમાં લેવું.)

– અરે હા, મને ઇમેલ કરતા મિત્રો નોંધ લે કે સંસ્થા આજકાલ એક આડા-રસ્તે વ્યસ્ત છે એટલે છેલ્લા એકાદ અઠવાડીયાથી ત્રણ-ચાર મિત્રો સિવાય દરેક ઇમેલના રીપ્લાય બાકી છે અને તે બદલ સંસ્થા દિલગીર પણ છે. (મારા આડા-અવળા કારસ્તાનો વિશે તો અહીયા વધારે કંઇ કહેવા જેવું નથી, મને સમજનારા અને નજીકથી ઓળખતા લોકો તો મનમાં સમજી જ જશે.)

– ઓકે. આજ માટે આટલી વાતો ઘણી છે, બીજી વાતો માટે ફરી કયારેક નવું પાનું ચીતરવામાં આવશે.


Ahmedabad Tweet Meetup
#Header Image:
ATM5 દરમ્યાન સાબરમતીની ચોપાટીએ મળેલા મિત્રોની સમુહ-છબી!
[click on image to open.]

તમે પણ કંઇક કહો ને...